Brtaniyanın Mühafizəkarlar Partiyası sentyabrın 5-i yeni liderinin və yeni baş nazirin adını açıqlayıb. Partiyadaxili səsvermə nəticəsində qalib xarici işlər naziri Liz Trass olub.
Trass və sabiq maliyyə naziri Rişi Sunak baş nazir vəzifəsi uğrunda rəqabətdə idilər.
Yeni baş nazir Britaniyada iqtisadi tənəzzül və enerji qiymətlərinin artımı nəticəsində yaranan çətinliklərlə mübarizə aparmalı olacacaq.
Baş nazir Boris Conson iyul ayında vəzifəsindən gedəcəyini elan etmişdi. O, bu addımı hökumətinin üzləşdiyi bir neçə qalmaqaldan sonra atmaq məcburiyyətində qalıb. Həmin qalmaqallardan biri onun öz hökumətinin tətbiq etdiyi COVID-19 karantin qaydalarını pozması olub.
Sentyabrın 7-si Trass Şotlandiyaya səfər edəcək. Orada Kraliça Elizabet rəsmən Trassı hökumət formalaşdırmağa dəvət edəcək.