“Azadlıq” qəzetinin əməkdaşı Səadət Cahangir prokurorluğun onun ölkədən çıxışına qoyduğu qadağaya görə məhkəməyə müraciət edib.
Bu barədə jurnalist özü məlumat verib. O, bildirib ki, heç bir cinayət işi üzrə şübhəli və ya təqsirləndirilən şəxs olmadığı üçün prokurorluğun onun ölkədən xaricə çıxışının qadağan edilməsi ilə bağlı qərarı qanunsuzdur.
S.Cahangir onu da deyib ki, AXCP sədri Əli Kərimlinin həbsdə olan mühafizəçisi Niyaməddin Əhmədovun işi üzrə istintaqda şahid qismində dindirilib, həmin cinayət işi məhkəməyə göndərilib, hökm də çıxarılıb.
Prokurorluğun nümayəndəsi isə bildirib ki, N.Əhmədovun işi məhkəməyə göndərilsə də, ondan başqa bir cinayət işi ayrılıb ki, həmin iş hələ bağlanmayıb. Ona görə də Səadət Cahangirin ölkədən çıxış qadağası qalmalıdır.
Jurnalist isə cavabında bildirib ki, şahidə ölkədən çıxış qadağasının tətbiqi qanunda nəzərdə tutulmayıb.
İyunun 17-də işə baxaraq qərar çıxaran Binəqədi rayon Məhkəməsi jurnalistin prokurorluğa qarşı şikayətini təmin etməyib.
S.Cahangir yerli məhkəmələr şikayətini təmin etmədiyi halda Avropa İnsan Haqları Məhkəməsinə müraciət edəcəyini deyib.