Avropa Şurasının insan hüquqları üzrə komissarı Dunya Miyatoviç Azərbaycan prezidenti İlham Əliyevə müraciətində Milli Məclisin dekabrın 30-da keçirilən iclasında qəbul edilmiş KİV haqqında qanunu təkmilləşdirilməsi üçün parlamentə qaytarmağa çağırıb. O məktubunda KİV haqqında yeni qanunun geniş və əsaslı məsləhətləşmələr aparılmadan qəbul edilməsi ilə bağlı narahatlığını ifadə edir.
Myatoviçin fikrincə qanun insan hüquqları, ifadə azadlığı və KİV azadlığı sahəsində beynəlxalq standartlara uyğun deyil. KİV sahəsini və jurnalist peşəsini nəzarət altına alır ki, bu da azad, müstəqil media prinsiplərinə ziddir.
“Yeni qəbul edilmiş qanun ifadə azadlığı və KİV azadlığı sahəsində durumu daha da pisləşdirməyə yönəlib. Hakimiyyət orqanlarına lisenziyalaşdırma yolu ilə jurnalistlərin işini həddindən artıq məhdudlaşdırmaq səlahiyyəti verir. O, həmçinin media şirkətlərinin və təşkilatlarının maliyyə, hüquqi və əməliyyat fəaliyyətinə məhdudiyyətlər tətbiq etmək imkanı verir”, -deyə Dunya Miyatoviç bildirir və qanunvericiliyin söz və KİV azadlığı sahəsində beynəlxalq standartlara, Avropa standartlarına uyğunlaşdırılmasının vacibliyini vurğulayır.