Vətəndaş və İnkişaf Partiyasının sədri Əli Əliyev pandemiya ilə bağlı olaraq 1 gün karantində saxlanıldıqdan sonra Bakı İstintaq Təcridxanasına köçürülüb.
Bu barədə “Xural” qəzetinin baş redaktoru Əvəz Zeynallı məlumat paylaşıb.
Ə.Zeynallı bu gün Əli Əliyevi ziyarət etmək üçün Bakı İstintaq Təcridxanasına getdiyini, lakin görüşə icazə verilmədiyini, ona Ə.Əliyevin vəziyyəti barədə məlumat verildiyini deyib:
“Vəziyyəti və səhhəti normaldır. Dünən evindən pal-paltar gətiriblər. Ailəsi ilə telefon əlaqəsi saxlayıb və gələn həftə qanuna müvafiq qaydada görüşə biləcək. Bizim apardığımız sovqatı bu səbəblə götürmədilər və bazar ertəsi evdən sovqat gətiriləcək”.
Qeyd edək ki, Əli Əliyev Yasamal Rayon Məhkəməsinin qərarı ilə Dövlət Sərhəd Xidmətinin polkovnik-leytenantı Emil Cəfərovun xüsusi ittiham qaydasında verdiyi şikayəti əsasında 5 ay meddətinə azadlıqdan məhrum edilib.
Xatırladaq ki, 2021-ci il noyabrın 30-da Dövlət Sərhəd Xidmətinə (DSX) məxsus Mi-17 tipli helikopterin qəzaya uğraması nəticəsində yaralanmış polkovnik-leytenant Emil Cəfərov və kapitan Ramin Ədilov VİP sədri Əli Əliyevə qarşı Cinayət Məcəlləsinin 147.1-ci maddəsinə uyğun olaraq xüsusi ittiham qaydasında şikayət veriblər. Şikayətdə Ə.Əliyevin 6 ay müddətinə azadlıqdan məhrum edilməsi istənilib.