Daxili işlər naziri, general-polkovnik Vilayət Eyvazov ötən ilin sentyabrın 30-da serjantı İsmayıl Məmmədovun şöbədə ondan şikayətçi olan arvadı Xanım Məmmədovanı güllələyib öldürməsinə görə bir sıra polis əməkdaşlarını cəzalandırıb.
Belə ki, X.Məmmədova şöbədə olduğu vaxt əri İ.Məmmədovu ora çağıran Nizami RPİ-nin 24-cü Polis Şöbəsinin təhqiqatçısı, polis polkovnik-leytenantı Füzuli Qurbanov nazirin əmri ilə daxili işlər orqanlarında xidmətdən xaric edilib.
Nazirin digər əmri ilə həmin şöbənin rəisi, polis polkovnik-leytenantı Seymur Qarayevə şiddətli töhmət verilib.
Qeyd edək ki, İsmayıl Məmmədov şöbədə uşaqları ilə birgə təhqiqatçı Füzuli Qurbanovun otağında gözləyən arvadı Xanım Məmmədovaya xidməti silahından 15 dəfə atəş açaraq onu xüsusi amansızlıqla qətlə yetirib. Hazırda cinayət işinə Bakı Ağır Cinayətlər Məhkəməsində baxılır.