Şəmkir rayonu, Ələsgərli kənd sakini Şəhla Süleymanovaya və bacısı Şəlalə Tağıyevaya bıçaqla xəsarət yetirməkdə təqsirləndirilən Gürzalı Alyarova Gəncə Ağır Cinayətlər Məhkəməsinin hökmü ilə yüngül cəza verilib.
Hadisə 26 may 2021-ci ildə baş verib. Birgə yaşadıqları evdə şəxsi münasibətlər zəminində aralarında baş vermiş mübahisə zamanı Gürzalı Alyarov bıçaqla arvadı Şəlalə Tağıyevaya ağır dərəcəli bədən xəsarəti yetirib. G.Alyarov daha sonra həmin vaxt onları sakitləşdirməyə çalışan baldızı Şəhla Süleymanovaya da bıçaqla həyatı üçün təhlükəli olan ağır dərəcəli bədən xəsarəti yetirib.
Faktla bağlı Cinayət Məcəlləsinin 126.2.1 (qəsdən sağlamlığa ağır zərər vurma iki və daha çox şəxsə qarşı törədildikdə) və 126.2.3-cü (qəsdən sağlamlığa ağır zərər vurma-xüsusi amansızlıqla, o cümlədən zərərçəkmiş şəxsə ağır iztirablar verməklə və ya sifarişlə, habelə təqsirkar üçün aşkar surətdə köməksiz vəziyyətdə olan şəxsə qarşı törədildikdə) maddələri ilə cinayət işi başlanıb. Daha sonra cinayət işi baxılması üçün Gəncə Ağır Cinayətlər Məhkəməsinə göndərilib.
Məhkəmənin 29.12.2021-ci il tarixli hökmü ilə Gürzalı Alyarov barəsində əsassız olaraq Cinayət Məcəlləsinin 62-ci maddəsi (cinayətə görə müəyyən edilmiş cəzadan daha yüngül cəza təyin edilməsi) tətbiq edilib və ona maddənin sanksiyasında nəzərdə tutulan cəzanın aşağı həddindən də az cəza, yəni 1 il 6 ay müddətə azadlıqdan məhrum etmə cəzası təyin edilib.
Təyin olunmuş cəza törədilmiş cinayət əməlinin ictimai təhlükəlilik dərəcəsi və xarakterinə, cinayəti törədənin şəxsiyyətinə uyğun olmadığından dövlət ittihamçısı (prokuror) cinayət qanununun normasının düzgün tətbiq edilməməsi əsası ilə məhkəmə hökmündən apellyasiya protesti verib.