Azərbaycan Uşaqlar Birliyinin sədri Kəmalə Ağazadə sosial şəbəkə hesabında narkotik maddə istifadəçisi olan 11 yaşlı uşaqla bağlı məlumat paylaşıb.
K.Ağazadə betonun üzərində yatan uşağın narkotik asılılıqdan psixi xəstəyə çevrildiyini, aidiyəti orqanların uşağa dəstək göstərmədiyini deyib: “Həmin uşaqdır, dəfələrlə yerləşdirilən, dəfələrlə qaçan və ya qaçmağa şərait yaradılan… Bu uşaq narkotik asılılığından psixi xəstəyə çevrilib. Heç olmasa, onu ruhi-əsəb xəstəxanasına yerləşdirin. Nizami metrosunun, Kapital Bankın yaxınlığındadır. Bu uşaq Azərbaycan vətəndaşıdır. R-nı dəfələrlə Bakı şəhər Polis İdarəsinin əməkdaşları, Yasamal Polis İdarəsinin əməkdaşları tapıb aparıb aidiyyəti, daha dəqiq desəm, Səhiyyə Nazirliyinin 103 xidməti vasitəsi ilə dispanserə, xəstəxanaya yerləşdirilib. Amma heç 1 saat keçmədən səhiyyə müəssisəsi əməkdaşları “ayyy, qaçdı!” deyib xəstə bir uşaqdan qurtulublar”.