Azərbaycan SSR Kommunist Partiyasının birinci katibi olmuş Əbdürrəhman Vəzirov vəfat edib.
Bu barədə Ə. Vəzirovun yaxınları məlumat yayıb.
Bildirilib ki, Ə.Vəzirov bu gün səhər saatlarında 91 yaşında Moskvada vəfat edib.
Qeyd edək ki, Əbdürrəhman Xəlil oğlu Vəzirov 1930-cu ildə Bakının Binəqədi rayonunda (əvvəlki adı Kirov) doğulub. Əslən Şuşalıdır, Qarabağın son xanının baş vəziri Mirzə Camal Cavanşir Qarabağinin nəslindəndir. Soyadının Vəzirov olması da buradan qaynaqlanır. Anası Füzuli rayonunun (keçmiş Karyagin) KP birinci katibinin bacısı olub. 1947-ci ildə Bakı şəhər 160 nömrəli orta məktəbdə təhsil alıb. 1952-ci ildə Azərbaycan Sənaye İnstitutunun (indiki Azərbaycan Neft və Sənaye Universiteti) energetika fakültəsini bitirib.
1985-ci ildə Qorbaçov Əbdürrəhman Vəzirova Azərbaycana rəhbərlik etməyi təklif etmişdi, lakin diplomatik işi daha üstün tutan Ə.Vəzirov o vaxt bu təklifdən imtina etmişdi. İkinci dəfə ona 1988-ci ildə Azərbaycana rəhbərlik etmək təklif edildi və Vəzirov bu təklifi qəbul etdi. 1988-ci il mayın 21-dən 1990-cı il yanvarın 20-nədək Azərbaycan SSR Kommunist Partiyası Mərkəzi Komitəsinin 1-ci katibi olub. 1979–1985-ci illərdə SSRİ-nin Nepalda, 1985–1988-ci illərdə isə Pakistanda fövqəladə və səlahiyyətli səfiri olub.
2009-cu ildə onun “Mənim diplomatik xidmətim” adlı xatirələri işıq üzü görüb.
Ə.Vəzirov uzun illər idi ki, Rusiyada yaşayırdı.