Dövlət Gömrük Komitəsi yanında “Azərterminalkompleks” Birliyinin keçmiş vəzifəli şəxsləri Etiqam Babayev barəsində Cinayət Məcəlləsinin 308.1 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri, İsmətulla Tağıyev barəsində Cinayət Məcəlləsinin 309.1 (vəzifə səlahiyyətlərini aşma) və 32.4, 313-cü (vəzifə saxtakarlığına təhrik etmə) maddələri ilə başlanmış cinayət işinin istintaqı yekunlaşıb.
Bu barədə Baş Prokurorluğun Mətbuat xidməti məlumat yayıb.
Məlumatda bildirilib ki, istintaqla müəyyən edilib ki, 2020-ci ilin iyul ayında “Azərterminalkompleks” Birliyinin müvəqqəti saxlanc anbarlarının fəaliyyətinin təşkili üzrə Astara bölməsinin rəisi Etiqam Babayev vəzifə səlahiyyətlərindən sui-istifadə edərək müxtəlif vaxtlarda İran vətəndaşları tərəfindən gətirilməklə Astara Gömrük postunda müvəqqəti saxlanca qəbul etdiyi dəyəri ümumilikdə 33 min 440 manat təşkil edən tibbi vasitələrini sənədləşmə aparılmadığı üçün geri qaytarmalı olduğu halda, həmin birliyin texniki xidmət göstərilməsi üzrə Astara şöbəsinin inspektoru İsmətulla Tağıyev ilə aralarındakı sövdələşməyə uyğun olaraq bir hissəsini saxta akt tərtib etməklə, qalan hissəsini isə aktsız İ.Tağıyevə təhvil verib.
İ.Tağıyev isə vəzifə səlahiyyətlərini aşaraq qeyd edilən malları şəxsi məqsədləri üçün istifadə olunması üçün tanışına təhvil verib, bununla da dövlətin qanunla qorunan mənafelərinə mühüm zərər vurub.
Cinayət işi baxılması üçün bakı Ağır Cinayətlər Məhkəməsinə göndərilib.