Bu gün Bakı Ağır Cinayətlər Məhkəməsində keçirilən prosesdə dövlət ittihamçısı Zəfər Ramazanov çıxış edərək keçmiş Baş prokuror Eldar Həsənovun 11 il müddətinə azadlıqdan məhrum edilməsini istəyib.
Dövlət ittihamçısı eləcə də E.Həsənova məxsus aşağıdakı əmlakların müsadirə edilməsini istəyib:
– Nardaran qəsəbəsində yerləşən bağ evi və torpaq sahəsi;
– Nəsimi rayonunda yerləşən mənzil;
– Nərimanov rayonunda yerləşən mağaza;
– Novxanı qəsəbəsində yerləşən torpaq sahəsi;
– Xətai rayonunda yerləşən fərdi yaşayış evi;
– Monteneqroda yerləşən mənzil.
Bundan sonra prosesdə cinayət işi üzrə zərərçəkmiş qismində tanınan Xarici İşlər Nazirliyinin nümayəndəsi çıxış edərək keçmiş Baş prokurorun vurduğu zərərəin əvəzi olaraq 18,5 milyon manat ödəməsini istəyib.
Qeyd edək ki, ittihama görə, Eldar Həsənov Azərbaycanın Rumıniya, Serbiya, Bosniya və Herseqovina və Monteneqroda fövqəladə və səlahiyyətli səfiri kimi fəaliyyət göstərdiyi 2010-2020-ci illərdə 17.931.316 manat pul vəsaitini səfirliklər üçün yeni inzibati binaların alınması, habelə təmir-tikinti işləri ilə əlaqədar israf edib və mənimsəyib.
O, cinayət yolu ilə əldə edildiyini bilə-bilə 11.804.661 manat məbləğində pulu leqallaşdırmaqda, rəsmi sənədlərə bilə-bilə yalan məlumatlar daxil edərək vəzifə saxtakarlığı törətməkdə, vəzifə səlahiyyətlərindən sui-istifadə etməklə dövlətin qanunla qorunan mənafelərinə ağır nəticələrə səbəb olan 327.373 manat zərər vurmaqda və dövlət büdcəsinin 192.387 manat pulundan təyinatı üzrə istifadə etməməkdə ittiham edilir.