Azərbaycanda ən xırda pul vahidi olan 1, 3 və 5 qəpikləri mağazalar qəbul etmir.
Böyük supermarketlər xırda qəpikləri qəbul etsə də, digər alış-veriş dükanlarında 1, 3 və 5 qəpiklik götürmürlər. Buna baxmayaraq, pulun qalığını qaytaranda 1, 3, 5 qəpik verirlər.
Xırda qəpiklərin götürülməməsi qanunsuz olsa da, satıcılar öz bildiklərini edirlər.
İqtisadçı Xalid Kərimli xüsusilə ticarət mərkəzlərində yaşanan bu halın qanun pozuntusu olduğunu deyir. Ölkədə valyuta tənzimi ilə bağlı qanunun olduğunu qeyd edən X.Kərimli həmin qanuna əsasən milli valyuta ilə hesablamalarda heç bir məhdudiyyət qoyulmadığını bildirir:
“Bu məsələ Mərkəzi Bankın səlahiyyətinə daxildir. Əgər Mərkəzi Bankın 1, 3, 5 qəpiklərin dövriyyədən çıxarılması ilə bağlı qərarı yoxdursa, mübadilələrdə, ödənişlərdə istifadə edilə bilər. Mağazalarda, avtobuslarda xırda pulların qəbul edilməməsi birbaşa Azərbaycan qanunvericiliyinin pozulmasıdır. Bu qanun pozuntusu ilə bağlı vətəndaşlar İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə şikayət edə bilərlər”.