İnsanları şantaj edərək pul almaqda təqsirləndirilən Ata Abdullayevin cinayət işi üzrə məhkəmə prosesi yekunlaşıb.
Bu gün Bakı Ağır Cinayətlər Məhkəməsində hakim Fikrət Qəribovun sədrliyi ilə keçirilən sonuncu məhkəmə iclasında A.Abdullayev ağlayaraq son söz deyib:
“Başqa müstəvidə günahımın nədən ibarət olduğunu bilirəm, buna görə dəfələrlə üzr istəyirəm. Mən bilirəm ki, nəyə görə buradayam”.
Daha sonra hökm elan edilib. Hökmə əsasən, Ata Abdullayev 7 il müddətinə azadlıqdan məhrum edilib.
Qeyd edək ki, özünü bloqer kimi təqdim edən A.Abdullayev bu ilin martında DTX əməkdaşları tərəfindən saxlanılıb. Ona Cinayət Məcəlləsinin 182-ci (hədə-qorxu ilə tələb etmə) maddəsilə ittiham elan edilib. Cinayət işi üzrə 4 zərərçəkmiş var. Onlardan biri keçmiş MTN işçisi, biri Abşeron İcra Hakimiyyətinin əməkdaşı, digər ikisi isə sahibkardır.
Onu da qeyd edək ki, Ata Abdullayev daha əvvəl də iki dəfə məhkum olub. O, 2004-cü ildə hərbi xidmətdən yayınmada, 2014-cü ildə isə kibercinayətkarlıqda təqsirlənidirilərək azadlıqdan məhrum edilib.