Diabet xəstələri dərmanla təminatda çətinliklər çəkirlər. Onlar saatlarla və günlərlə xəstəxananın qarşısında növbədə durub dərman götürməyə çalışırlar. Bu problem demək olar ki, ölkənin bütün bölgələrində yaşanır.
Sosial şəbəkələrdə Mingəçevir Mərkəzi Xəstəxanasının da qarşısında bu cür növbə ilə bağlı foto yayılıb. Gecə saat 2-dən növbəyə düzülən xəstələr ehtiyacları olan dərmanları ala bilmirlər.
Bu vəziyyətlə bağlı Mingəçevir Mərkəzi Xəstəxanasından bildirilib ki, alınan dərmanların sayı xəstələrin sayına uyğun olmadığından xəstəxananın qarşısında belə növbə yaranır:
“Mingəçevir Şəhər Mərkəzi Xəstəxanası Publik Hüquqi Şəxsdə qeydiyyatda olan şəkərli diabet xəstələrinin sayı 4523 nəfərdir. Xəstələrin dərman təminatını yetəri qədər təmin etmək üçün hər ay xəstəxana tərəfindən İnnovasiya və Təchizat Mərkəzinə sifariş yazılır. Lakin hər ay üçün alınan dərmanların sayı xəstələrimizin sayına uyğun olmadığı üçün böyük problemlə qarşılaşırıq. Bununla bağlı lazımı üst qurumlara müraciətlər olunmasına baxmayaraq, nəticə hələ də dəyişməz olaraq qalır. Bu səbəbdən xəstələr tərəfindən bu şəkildə növbələr yaranır”.
Səhiyyə Nazirliyinin Mətbuat Xidmətindən isə bildirilib ki, şəkərli diabet xəstəliyinin müalicəsi üçün lazım olan dərmanlar Nazirlər Kabinetinin qərarına uyğun olaraq Səhiyyə Nazirliyinin İnnovasiya və Təchizat Mərkəzi tərəfindən xəstə sayına uyğun olaraq alınır və Tibbi Ərazi Bölmələrinin İdarəetmə Birliyinin tabeliyində olan tibb müəssisələrinə təqdim edilir. Dərman preparatlarının xəstələrə paylanması bu müəssisələr tərəfindən həyata keçirilir.
Qeyd edək ki, hazırda Azərbaycanda qeydiyyatda olan şəkərli diabet xəstələrinin sayı 283 min nəfərdir.