Bu gün BMT-nin Haaqa Beynəlxalq Məhkəməsi 44 günlük müharibədən sonra gərginliyin azaldılması üçün fövqəladə tədbirlərə dair Ermənistanın və Azərbaycanın sentyabr ayında qaldırdıqları qarşılıqlı iddiaları üzrə qərar qəbul edəcək.
Hər iki iddiada tərəflər bir-birini milli və dini zəmində diskriminasiyada ittiham edirlər.
Məhkəmənin baş hakimi Coan Donohyu saat 14.00-da Ermənistan Respublikasının iddiası əsasında müvəqqəti tədbirlərin görülməsi barədə qətnaməni elan edəcək. Bundan sonra isə Azərbaycanın iddiası üzrə qətnamə qəbul ediləcək.
Qeyd edək ki, Haaqa Beynəlxalq Məhkəməsi İkinci Dünya müharibəsindən sonra BMT-yə üzv dövlətlər arasında mübahisələrin həlli üçün yaradılıb. Məhkəməyə müraciət edən tərəflər məhkəmənin çıxardığı qətnamələrə əməl etməyə borcludular.
Xatırladaq ki, Ermənistan “İrqi ayrı-seçkiliyin bütün formalarının ləğv edilməsi haqqında” Konvensiyanı pozduğuna görə Azərbaycan Haaqa Beynəlxalq Məhkəməsində iddia qaldırıb. İddiada qeyd edilib ki, Ermənistan azərbaycanlılara qarşı milli və ya etnik mənşəyinə görə bir sıra ayrı-seçkilik hərəkətləri edib və etməkdə davam edir. Ermənistan həm birbaşa, həm də dolayı yollarla etnik təmizləmə siyasətini davam etdirir və nifrət nitqindən istifadə edərək hökumətinin ən yüksək səviyyəsində də irqçi təbliğat aparır, azərbaycanlılara qarşı nifrət və etnik zorakılığı qaldırır. 2020-ci ilin payızında gedən döyüşlər zamanı azərbaycanlılar yenidən Ermənistanın etnik nifrət zəminində zorakılığının hədəfinə çevrilib. Ermənistan etnik, mədəni təmizləmə və azərbaycanlılara qarşı nifrət oyatmaq siyasəti yürüdərək, Konvensiyaya xələl gətirir, azərbaycanlıların hüquq və azadlıqlarını sistematik şəkildə pozur. Ermənistanın Azərbaycan əleyhinə ayrı-seçkiliklə bağlı siyasəti Konvensiyanın 2, 3, 4.5, 6 və 7-ci maddələrini pozulmasıdır. Azərbaycan məhkəmədən xahiş edib ki, Ermənistan Konvensiyanı pozduğuna görə məsuliyətə cəlb edilsin, Azərbaycana və xalqa vurduğu ziyanı ödəsin.