Dövlət Sərhəd Xidmətinin Sərhədçi İdman Kompleksində ötən gün Xızıdakı “Qaraheybət” poliqonunda qəzaya uğramış Mi-17 vertolyotunda şəhid olan zabitlərlə vida mərasimi keçirilib.
Vida mərasimində şəhidlərin ailə üzvləri və yaxınları, Dövlət Sərhəd Xidmətinin rəhbərliyi, ictimaiyyət nümayəndələri iştirak ediblər. Şəhidlərin cənazələri qoymaq üçün tribuna önünə postamentlər yerləşdirilib.
Vida mərasimində şəhid valideynləri və övladları şəhidlərin nəşinə sarılıb, forma və papaqlarını qucaqlayıblar.
Daha sonra şəhid olan 14 hərbçi dəfn olunub. Onlardan 11-nin cənazəsi II Şəhidlər xiyabanında torpağa tapşırılıb. Dəfn zamanı yaylım atəşi açılıb, Azərbaycanın Dövlət Himni səsləndirilib.
Digər üç şəhid – polkovnik Fizuli Cavadov Zirə qəsəbəsində, kapitan Xəyyam Əliyev Əmircan qəsəbəsində, baş leytenant Fərid Nağıyev isə ailələrinin istəyi ilə Beyləqan rayonunda dəfn olunub.
Qeyd edək ki, qəzada polkovnik Cavadov Fizuli Əli İbram oğlu, polkovnik Nəzirov Emil Nəzir oğlu, mayor Həsənov Elmir Mircəlil oğlu, mayor Əhmədov Elbrus Səmrəddin oğlu, mayor Mayılov Emil Şahid oğlu, mayor Məmmədov Murad Yaşar oğlu, mayor Əliyev Emil Elman oğlu, tibb xidməti kapitanı Əhmədxanov Ceyhun Xanlar oğlu, kapitan Bayramlı Cavid Əhliman oğlu, kapitan Əliyev Xəyyam Əlixan oğlu, kapitan Qaraisayev Teymur Ənvər oğlu, leytenant Süleymanov Abdulla Telman oğlu, baş leytenant Nağıyev Fərid Təyyar oğlu, işçi Nəbiyev Elçin Fikrət oğlu şəhid olublar.
Hadisə zamanı polkovnik-leytenant Cəfərov Emil Məmməd oğlu və kapitan Ədilov Ramin Ramiz oğlu yaralanıb.
