Avropa İnsan Hüquqları Məhkəməsi (AİHM) noyabrın 18-də Azərbaycanla bağlı növbəti qərarlarını elan edib.
Birinci iş üzrə ərizəçi Səyyarə Əhmədovanın şikayəti onun evinin sökülməsi, onun və qızının kompensasiya ödənilmədən evdən çıxarılmasını nəzərdə tutan qərarlarla bağlı idi. Şikayətə görə ərizəçi 2007-ci ildə Bakının Səbail rayonunda ev satın alıb. 3 il sonra yerli məhkəmələr evin neft hasilatı üçün ayrılmış dövlət torpaq sahəsində icazəsiz tikilməsi əsası ilə Dövlət Neft Şirkətinin evin sökülməsini və ərizəçinin evdən çıxarılmasını tələb edən iddiasını təmin edib. Ərizəçi AİHM-ə şikayət edərək mülkiyət və şəxsi həyata hörmət hüququna müdaxilənin baş verdiyini bildirmişdi.
AİHM bu işdə hesab etdi ki, əgər ərizəçinin evindən çıxarılması və evin sökülməsi baş verərsə bu halda onun Konvensiyanın 8-ci maddəsi ilə təminat altına alınan hüquqları pozulmuş hesab ediləcək. Məhkəmə həmçinin pozuntunun müəyyən edilməsinin ərizəçiyə dəymiş mənəvi zərərə ədalətli kompensasiya təşkil etdiyini vurğulayıb.
AİHM ikinci iş üzrə qərarında hesab etdi ki, ərizəçilər – İstanbulda yaşayan Türkiyə vətəndaşı Serpil Par və Yaponiya vətəndaşı Katsunori Hyodoya münasibətdə mülkiyət hüququnun pozuntusu baş verib. Qərara əsasən Azərbycan hökuməti birinci ərizəçiyə 210 min avro, ikinci ərizəçiyə isə 127 min avro maddi zərərə görə təzminat ödəməlidir.
Bu işdə ərizəçilərin şikayəti 2010 və 2011-ci illərdə Bakı beynəlxalq hava limanından keçərkən gömrük orqanları tərəfindən saxlanılmaları, bəyan edilməmiş pul məbləğinin götürülməsi ilə bağlı idi.
Hər iki ərizəçiyə hadisələrin baş verdiyi zaman qaçaqmalçılıq ittihamı ilə cinayət işi qaldırılıb. Həmin cinayət işinə ərizəçilər bəyan edilməyən pulun müsadirəsinə razılıq verdikdən sonra xitam verilib. Qısa müddət sonra ölkəni tərk edən ərizəçilər sonra pullarının geri qaytarılması tələbi ilə məhkəməyə müraciət etsələr də bunun nəticəsi olmayıb.
Onlara məxsus pul məbləğinin qanunsuz, təzyiq altında müsadirə edildiyini iddia edən ərizəçilər mülkiyət hüquqularına müdaxilənin baş verdiyini iddia edirdilər.