Ağcabədi rayon Minəxorlu kənd bələdiyyəsinin keçmiş sədri Ədalət Mənsimov dələduzluqda təqsirləndirilir.
O, işlədiyi müddətdə qulluq mövqeyindən tamah niyyətilə istifadə edərək rəsmi sənədlərə bilə-bilə yalan məlumatlar daxil edib 5 min 839 manat məbləğində bələdiyyə vəsaitini bələdiyyənin hesabından məxaric edərək mənimsəyib.
Bundan başqa, keçmiş bələdiyyə sədri bələdiyyə torpaqlarının ayrı-ayrı şəxslərin istifadəsində qalmasına qanunsuz şərait yaratmaq məqsədilə həmin torpaq sahələri üzrə hərrac müsabiqəsi nəticəsində müəyyən olunmuş icarə haqqı qiymətlərinin xeyli aşağı salınmasına dair məsələni heç bir hüquqi əsas olmadan bələdiyyə üzvlərinin müzakirəsinə çıxararaq qərar qəbul olunmasına nail olmaqla hərrac müsabiqəsi ilə müəyyən edilmiş icarə haqqının bir neçə il ərzində mənimsəməklə 80 min manat məbləğində maddi zərər vurub. Həmçinin o, ayrı-ayrı şəxslərin istifadəsinə bələdiyyə torpaqlarının veriləcəyi ilə bağlı yalan vədlər verərək onlardan ümumilikdə 7 min 500 manat məbləğində pul alaraq dələduzluq edib.
Ədalət Mənsimov Cinayət Məcəlləsinin 178.2.3, 178.2.4 (şəxs tərəfindən öz qulluq mövqeyindən istifadə etməklə xeyli miqdarda dələduzluq törədildikdə), 179.2.3, 179.2.4 (şəxs tərəfindən öz qulluq mövqeyindən istifadə etməklə xeyli miqdarda ziyan vurmaqla mənimsəmə), 308.1 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə təqsirləndirilən şəxs qismində cəlb edilərək barəsində başqa yerə getməmək haqqında iltizam növündə qətimkan tədbiri seçilib.
Cinayət işi baxılması üçün aidiyyəti üzrə rayon məhkəməsinə göndərilib.