“Sahibkarlıq fəaliyyəti haqqında” qanuna görə, dövlət məmurları, Milli Məclisin deputatları sahibkarlıq fəaliyyəti ilə məşğul ola bilməzlər.
Lakin buna baxmayaq, bu gün ölkədə biznes fəaliyyəti ilə məşğul olan kifayət qədər məmurlar var. Düzdür, onlar bu fəaliyyətlərini rəsmi şəkildə həyata keçirmirlər, özlərinə yaxın şəxslərin adlarına rəsmiləşdirirlər. Əksər hallarda isə öz şəxsi statusundan və təsir imkanlarından bu biznes şəbəkələrini böyütmək üçün istifadə edirlər.
Ən gəlirli biznes sahələrindən hesab olunan özəl klinikaların çoxu məmurlarındır. Bakının iki böyük tibb mərkəzləri olan “German Hospital”ın və “Astoriya Tibb Mərkəzi”nin Azərbaycan Milli Elmlər Akademiyasının (AMEA) prezidenti, Prezident Adminstrasiyasının keçmiş rəhbəri Ramiz Mehdiyevə məxsus olduğu deyilir.
İddialara görə, hər iki klinikanı AMEA rəhbərinin kürəkəni, Milli Məclisin keçmiş deputatı İlham Əliyev idarə edir. Onun adıçəkilən tibb mərkəzləri ilə yanaşı, digər sahibkarlıq subyektlərinin olduğu da deyilir. “Topaz” MTK və “Qala-R.L” MTK, “NLT” MMC, “Premium Store” MMC, “NLT” MTK, “Servis” MTK, “Grand Palace” MTK, “Astoriya” MTK.
Paytaxtın digər iki böyük klinikası “Azərbaycan Dəmir Yolları” QSC-nin sədri Cavid Qurbanova məxsusdur. C.Qurbanov bir qədər fərqli texnologiyadan istifadə edir. O, ümumi klinika işlətməkdənsə, ixtisaslaşmış tibb mərkəzləri yaratmağa üstünlük verir. Məhz elə bu səbəbdəndir ki, ona məxsus olduğu deyilən “Referans klinikası” laborator müayinələr, “Lor Hospital” isə qulaq, burun, boğaz və baş-boyun mərkəzi olaraq fəaliyyət göstərir.
Paytaxtın Xətai rayonunda yerləşən “Medika Hospital”ın Dövlət Gömrük Komitəsinin sədri Səfər Mehdiyevə məxsus olduğu deyilir. İddialara görə, bir müddət öncə Nizami rayonunda ikinci filialı açılan klinikaya komitə sədrinin qayınları Tarquliyevlər rəhbərlik edirlər.
Prezident Adminstrasiyası Dövlət Nəzarəti şöbəsinin müdiri Kərəm Həsənovun da “Mediland Hospital”adlı klinikası var. Onun Əmlak məsələləri üzrə Dövlət Komitəsinə rəhbərlik edən zaman bu hospitalı təsis etdiyini, hazırda isə deputat qardaşı Malik Həsənovun klinikaya nəzarət etdiyi bildirilir.
Fövqəladə Hallar naziri Kəmaləddin Heydərovun həyat yoldaşının da Səbail rayonu ərazisində klinikası fəaliyyət göstərir. Məlumatlara görə, tibb ocağı “Koreya Şərq Təbabəti klinikası” adlanır. Həyat yoldaşı Ruhəngiz Heydrovanın rəhbəri olduğu SEBA ilə Kyung Hee Universiteti arasında müqavilə əsasında bu tibb mərkəzi fəaliyyət göstərir.
“Azərsu” ASC-nin keçmiş sədri Qorxmaz Hüseynov da özəl tibb sektorunda pay sahibi olan məmurlardandır. “Diaqnoz” Tibb Mərkəzi ona məxsusdur. Uzun müddətdir klinikaya həyat yoldaşı rəhbərlik edir.
Daşınmaz Əmlakın Dövlət Reyestri Xidmətinin rəisi işləmiş Arif Qaraşov paytaxtın Nəsimi rayonunda yerləşən “Medical Plaza”nın faktiki sahibidir. Klinikanın qanuni təmsilçisi Qaraşova Rəmziyə Sahib qızıdır. R.Qaraşova isə Arif Qaraşovun həyat yoldaşıdır.
“Real” Tibb Mərkəzi isə Xətai rayon İcra Hakimiyyətinin keçmiş başçısı Razim Məmmədova məxsusdur. Hazırda bu klinikanın direktoru onun qızıdır. Bununla yanaşı keçmiş icra başçısının eyni adda tikinti firmasının da mövcud olduğu barədə məlumat var.
Binqədədi rayonundakı “Elmed” klinikası Cəbrayıl rayonunun keçmiş icra başçısı Mahmud Quliyevə məxsusdur. Klinikanın direktoru onun qardaşı oğlu Ramin Quliyevdir. Bu klinika əsasən cərrahiyə əməliyatları üzrə ixtisaslaşıb.
Ölkənin ilk tibb mərkəzlərindən olan “Oksigen klinikası” Milli Məclisin keçmiş deputatı, “Odlar Yurdu” Universitetinin rektoru Əhməd Vəliyevə məxsusdur. Bu klinika Bakının çox az özəl tibb müəssisələrində həyata keçirilən doğuş və qeysəriyə əməliyatları həyata keçirmək lisenziyasına malikdir. Qiymətlər isə olduqca bahadır.