“Kəraməti hər şeydən təcrid ediblər, yanına heç kimi buraxmırlar. Mən oğlumun səsini belə eşidə bilməmişəm”.
Bunu Maştağadakı Narkoloji Dispanserə yerləşdirilən yazıçı Kəramət Böyükçölün atası, şair-publisist Qəşəm Nəcəfzadə deyib.
Q.Nəcəfzadə oğlunun könüllü müalicəyə getdiyini vurğulayaraq, dispanser rəhbərliyindən bütün qapıların bağlanmamasını xahiş edib:
“Heç olmasa, ata-ana ilə görüşməsinə imkan yaratsınlar. Əlinə telefon versinlər, səsini eşidək, üzünü görək. Həkimlər deyirlər ki, durumu yaxşıdır. Mən anlamıram, həyatdan təcrid edilən insan necə yaxşı ola bilər? Üstəlik, yazıçı, jurnalistdir. Bəlkə qəzetləri, saytları oxumaq istəyir, ailəsi ilə danışmaq istəyir. İki azyaşlı övladı var, onlarla belə danışmağına icazə verilmir. Anasının təzyiqi var, mənim ürəyim xəstədir, Kəramət bizdən nigaran qalıb, daha da depressiyaya düşəcək.
Görüş üçün Narkoloji Dispanserin rəhbərliyinə müraciət etdim, amma heç bir faydası olmadı. Dedilər bu, bizim müalicə sistemimizdir. Belə müalicə sistemi olur? Mən mətbuat vasitəsilə müraciət edirəm. Kəramət adam öldürməyib, vətənə xəyanət etməyib. İçki düşkünlüyünə görə könüllü müalicə almaq istəyib. Özü polisin yanına düşüb, sərbəst şəkildə dispanserə gedib. İndi Kəraməti niyə bu hala salırlar? Belə davam edərsə, mətbuatı toplayıb, bütün aidiyyəti qurumlara müraciət edəcəyəm, hər yerə baş vuracağam. Məni oğlumla görüşdürsünlər”.
Qeyd edək ki, son günlər sosial şəbəkədə içkili vəziyyətdə canlı yayımlar açan yazıçı Kəramət Böyükçöl Maştağadakı Respublika Narkoloji Dispanserə yerləşdirilib.
Onun Narkoloji Dispanserə hüquq-mühafizə orqanlarının əməkdaşları tərəfindən aparıldığı bildirilir.