Milli Məclisin həbsdə olan keçmiş deputatı Rafael Cəbrayılov vəfat edib.
1958-ci il təvəllüdlü keçmiş deputat bu gün müalicə olunduğu “Yeni Klinika”da koronavirusdan dünyasını dəyişib.
Xroniki şəkərli diabetin kəskinləşməsindən və arterial hipertoniyadan əziyyət çəkən R.Cəbrayılov cəzaçəkmə müəssisəsində müalicə olunsa da, xroniki xəstəlikləri ilə əlaqədar təhlükəli risk qrupuna daxil olması nəzərə alınaraq sentyabrın 28-də müalicəsini davam etdirmək üçün “Yeni Klinika” xəstəxanasına yerləşdirilmişdi.
Əldə edilən məlumata görə, zərər çəkən kimi tanınan şəxslərdən biri keçmiş deputatın ölümündən xəbər tutan kimi morqa gedib və orada Rafael Cəbrayılovun yaxınlarından heç kəsin olmadığını görüb.
Bildirilir ki, keçmiş deputat son gününə qədər qardaşları Rauf Cəbrayılovla Elşən Cəbrayılovu ittiham edib. O, vəziyyəti ağırlaşan zaman zərər çəkənlərə xəbər göndərərək bildirib ki, baş verənlərdə onun günahı yoxdur. Onları aldadan qardaşları olub:
“Dedi ki, qardaşlarım məni müflis etdi, həbsxanaya düşməyimə səbəb oldu. Koronavirusdan öləcəyinə inanmırdı. Deyirdi ki, yaxınlarımın etdikləri məni öldürəcək. Sözlərindən məlum olurdu ki, həbsxanada da ona baş çəkməyiblərmiş”, – deyə zərər çəkən Məlahər Qurbanova bildirib.
Qeyd edək ki, R. Cəbrayılov deputat olarkən ayrı-ayrı şəxslərə torpaq sahəsinə mülkiyyət hüquqlarının dövlət qeydiyyatından keçirilməsi barədə çıxarışın alınmasında köməklik göstərəcəyi, eləcə də digər məqsədlərlə yalan vədlər verərək 11 nəfər şəxsin ümumilikdə 2 milyon 571 min manat məbləğində pul vəsaitini dələduzluq yolu ilə ələ keçirərək mənimsəməkdə ittiham edilirdi.
Rafael Cəbrayılovun borclu olduğu şəxslər aşağıdakılardır:
Təranə Fətəliyeva – 300 000 dollar
Məlahət Qurbanova – 580 000 dollar
Xatirə Nəcəfova – 200 000 dollar
Yusif Orucov – 200 000 dollar
Aynur Kazımova – 100 000 dollar
Şəfa Məmmədova – 80 000 dollar
Bəşir Məmmədov – 60 000 dollar
Allahverdi Səfərəliyev – 30 000 dollar
Bundan başqa Rafael Cəbrayılov deputat olarkən qardaşı Rauf Cəbrayılov Bakı şəhər sakininə Binəqədi rayonunda M.Ə.Rəsulzadə küçəsində yerləşən 2 hektar torpaq sahəsinə mülkiyyət hüquqlarının dövlət qeydiyyatına alınması barədə çıxarışın əldə edilməsində köməklik göstərilməsi ilə əlaqədar yalandan vəd verərək həmin adla ondan 240 min manat məbləğində pul vəsaitini alıb.
Cinayət Məcəlləsinin 178.3.2-ci (külli miqdarda ziyan vurmaqla dələduzluq) maddəsi ilə ittiham olunan keçmiş deputatın işi məhkəmə mərhələsində idi.