Kipr polisi ölkədə yaşayan “nüfuzlu biznesmeni” öldürmək üçün göndərildiyi ehtimal edilən azərbaycanlı killeri yaxalayıb.
Bu barədə in-cyprus.philenews.com portalı polisdəki mənbələrə istinadən xəbər verib.
Məlumatda bildirilir ki, Rusiya pasportu daşıyan 38 yaşlı azərbaycanlı sentyabrın 27-də Kiprin yunan hissəsi ilə türklər yaşayan hissəsi arasındakı Aqios Dometios nəzarət-buraxılış məntəqəsini keçdikdən tezliklə sonra Nikosiyada saxlanılıb.
Polis bir neçə gündür onu izləyirmiş, saxlanılarkən bu şəxsin avtomobilində səsboğucu ilə təchiz edilmiş tapança aşkarlanıb.
Polis ehtimal edir ki, şübhəli şəxs Nikosiyada qətl törətməyi planlaşdırıbmış. O, tək olmayıb, onunla birlikdə daha bir neçə azərbaycanlı Kiprə gedib. Məlum olub ki, azərbaycanlılar bir neçə gün əvvəl Kirpin Larnaka aeroportuna enən təyyarədə olublar. Onlar daha sonra adanın türk hissəsinə – tanınmamış Şimali Kipr Türk Respublikasına keçiblər. Lakin sonra onlar yenidən Kipr respublikasına geri qayıdıblar.