• 25 May 2024 10:02

Bu gün Vətən müharibəsində canlarından keçən qəhrəman şəhidlərimizin Anım Günüdür.

Səhər saatlarından başlayaraq respublikamızın bütün şəhər və rayonlarinda, azad edilmiş ərazilərimizdə anım mərasimləri keçirilir, xalqımız Vətən uğrunda canlarını fəda etmiş şəhidlərimizin xatirəsini qürurla yad edir.

Küçə, prospekt və meydanlarda, evlərin balkonlarında üçrəngli bayrağımız dalğalanır. Məscidlərdə, kilsələrdə, sinaqoqlarda Azərbaycanın ərazi bütövlüyü uğrunda canından keçmiş Vətən övladlarının ruhuna dualar oxunur.

Saat 12:00-da ölkə ərazisində şəhidlərin əziz xatirəsi bir dəqiqəlik sükutla yad edilib. Ölkənin bütün şəhər və rayonlarında insanlar yerində dayanaraq dualar oxuyub, sürücülər avtomobillərinin hərəkətini dayandıraraq siqnal veriblər.

Hərbi Qənimətlər Parkı ilə üzbəüz ərazidəki Bakı buxtasında Hərbi Dəniz Qüvvələrinə məxsus gəmilərin artilleriya qurğularından üç dəfə yaylım atəşi açılıb.

Bu gün səhər saatlarından etibarən minlərlə şəhər sakini Vətən müharibəsində şəhid olmuş igidlərin xatirəsini anmaq üçün Bakıdakı İkinci Fəxri Xiyabana axın edib.

Şəhərin mərkəzinə aparan bütün yollar bağlanıb, insanlar əllərində Azərbaycan bayraqları, güllər və şəhidlərin portretlərini tutaraq xiyabana piyada axın ediblər.

İkinci Fəxri Xiyabanda minlərlə insan şəhid general, Milli Qəhrəman Polad Həşimovun, polkovnik İlqar Mirzəyevin və digər şəhidlərin məzarlarına gül dəstələri qoyublar, onların ruhuna dualar oxuyublar.

Anım günündə Ermənistanın Gəncə şəhərinə raket hücumları nəticəsində həlak olan dinc sakinlərin də xatirəsi anılıb, dağılmış yaşayış binalarının ətrafına gül düzülüb.

Qeyd edək ki, bu ildən başlayaraq hər il sentyabrın 27-də Vətən müharibəsində qəhrəmancasına döyüşmüş, ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq  Anım Günü kimi qeyd ediləcək.