Azərbaycanlı iş adamı, “Palmali” şirkətinin sahibi Mübariz Mənsimov qardaşı Maarif Mənsimov tərəfindən məhkəməyə verilib.
Maarif Mənsimov qardaşını dələduzluqda ittiham edir. O, Mübariz Mənsimovun qəsdən dələduzluq, etibardan sui-istifadə etmə və prokurorluğun müəyyən edəcəyi digər cinayətlərə görə mühakimə olunmasını tələb edir.
Qardaşı iş adamının çirkli pulların yuyulmasında və bir çox cinayətlərdə əli olduğunu, mafiya ilə əlaqələrinin olmasını iddia edib. O, şikayət ərizəsində qeyd edib ki, qardaşı yalan söyləyərək dövlət adamları ilə əlaqəsi olduğunu bildirməklə iş dünyasını və bankirləri aldadıb və bununla da bütün ətrafına ziyan vurub.
Maarif Mənsimov Beşiktaş Ulusda yaşadığı villanın təxminən 17 il əvvəl Mübariz Mənsimovdan aldığını, lakin həmin vaxt Türkiyə vətəndaşı olmadığı üçün evini “Palmali” şirkəti üzərinə qeydiyyata saldığını, bir müddət sonra isə qardaşının evin onun adına keçirilməsini dəfələrlə ləngitdiyini bildirib. İddiaya görə, daha sonra isə iş adamı villanı borclarının müqabilində özəl banklardan birinə girov verib.
Maarif Mənsimov şikayət ərizəsində qardaşının davamlı olaraq insanlara qarşı dələduzluq etməsi, çirkli əlaqələr qurması, eyni gəmini üç fərqli adama satması səbəbindən onunla əlaqələri kəsdiyini bildirib.
O, Mübariz Mənsimovla bərabər Nuray adlı xanımın da onun çirkli işlərinin icraçısı, bəzən isə koordinatoru olduğunu bildirib.
Qardaşı Mübariz Mənsimovun “Sberbank”, Lukoil” kimi xarici şirkətlərin və yerli şirkətlərin zərərlə üzləşmələrinə səbəb olan saxtakarlıqlar etdiyini, Nuray adlı qadınla birlikdə saxta pul köçürmələri nəticəsində bir çox insana ziyan vurduqlarını iddia edib. Şikayət ərziəsində Mübariz Mənsimovun çirkli pulların yuyulmasında iştirakı ilə tanınan erməni əsilli mafiya lideri Levon Termedzyan və Sezgin Baran Korkmaz kimi şəxslərlə yaxın əlaqələrindən bəhs edilir.
Maarif Mənsimov şikayətində bütün bu qeyd etdiklərinin şübhəlilərin əsl üzünün, ölkəyə və cəmiyyətə verdikləri zərərin daha yaxşı başa düşülməsi üçün açıqlandığını bildirir. O, bu qədər haqsızlığın, qanunsuzluğun və vurulan ziyanın qarşılıqsız qalmamalı olduğunu qeyd edib.
O, şikayətinin sonunda qardaşının və adı çəkilən digər şəxsin layiq olduqları şəkildə cəzalandırılmaları üçün şikayət vermək məcbutiyyətində olduğunu bildirib.