Keçmiş icra başçısı Elmar Vəliyevin oğlu Elmir Vəliyev Göygöl sakini Mehman Həsənovun torpağını zəbt edib. M.Həsənov məhkəməyə üz tutub, lakin E.Vəliyev məhkəməni saymır.
Mehman Həsənov Göygöl rayon Məhkəməsində iddia qaldıraraq bildirib ki, Vəliyevlər onunla razılaşaraq əmlakını alıblar, amma əvəzində nə torpaq, nə də pul verirlər:
“Yeni Zod kəndindəki 10 sot torpaq sahəsinin mənim olduğunu təsdiqləyən sənədlər var. Həmçinin mülkiyyət hüququnu təsdiq edən çıxarış da mövcuddur. Həmin torpağı 2010-cu ildə alqı-satqı yoluyla almışam, ərazini hasarlamışam. 2013-cü ildə xəbər göndərdilər ki, Elmar Vəliyevin oğlu bu torpağı istəyir. Başa düşürdüm ki, müqavimət göstərməyin mənası yoxdur. Ona görə də əvvəlcədən xoşluqla razılaşdım”.
M.Həsənov ona gah pul verəcəklərini, gah da əvəzinə başqa torpaq sahəsi təklif edəcəklərini deyərək, Vəliyevlərin onu aldatdıqlarını bildirib:
“8 il keçib. Əlimdə sənədlər ola-ola həmin əraziyə də daxil ola bilmirəm. Mənim çəkdiyim hasarı sökdürüb, daha da hündürünü çəkiblər. Başqa qonşunun da ərazisini alıblar. Hasar o qədər hündürdür ki, içərini heç cür görmək olmur. Deyilənə görə Elmar müəllimin oğlu orada özünə istirahət yeri, idman meydançası düzəltdirib. Amma özüm görməmişəm.
Digər şəxslərə də heç nə ödənilməyib. Mənə bir neçə dəfə söz vermişdilər. Gəncə şəhər İcra Hakimiyyətində Elmar müəllimin Mahmud adlı işçisi əlaqə saxlayırdı. Bir neçə yerdə torpaq sahəsi göstərmişdi. Razılaşdığım da olmuşdu, amma sonradan onu da vermədilər. Aramızda söhbət olmuşdu deyə, mən şikayət etməyi özümə rəva görmürdüm. Axırda başa düşdüm ki, bunlar mənə heç nə vermək fikrində deyillər”.
Nə Elmir Vəliyev, nə də nümayəndəsi məhkəməyə gəlmədikləri üçün məhkəmə qeyri-müəyyən vaxta qədər təxirə salınıb.
Qeyd edək ki, Elmir Vəliyev Milli Məclisin İnzibati qanunvericilik sektorunun müdiridir.
Xatırladaq ki, Gəncənin keçmiş icra başçısı Elmar Vəliyev 2018-ci il iyulun 3-də güllələnərək ağır yaralanıb. Bu iş üzrə Gəncə sakini Yunis Səfərov təqsirləndirilərək məhkəmə önünə çıxarlıb. Bakı Ağır Cinayətlər Məhkəməsinin 16 avqust tarixli hökmü ilə Yunis Səfərov ömürlük azadlıqdan məhrum edilib.
Yunis Səfərov son sözündə deyib ki, Gəncənin keçmiş icra başçısı Elmar Vəliyev şəhər sakinləri ilə kobud davrandığı üçün o, E.Vəliyevə hücum edib.