Ermənistanın taleyi barədə məlumat vermədiyi 7 itkin hərbçimiz

Məlumat verdiyimiz kimi, Ermənistan indiyədək İkinci Qarabağ müharibəsində itkin düşmüş 7 hərbçimizin taleyi barədə məlumat vermir.

İtkin düşənlərdən biri leytenant, biri gizir, biri MAXE, 4-ü əsgərdir.

Leytenant Vəlizadə İbrahim Səməd oğlu 1998-ci ildə Naxçıvanın Şərur rayonunda anadan olub.

Müharibədən əvvəl Şəmkirdə “N” saylı hərbi hissədə xidmət edib.

Sonuncu dəfə ailəsi ilə sentyabrın 26-da əlaqə saxlayıb. Sonuncu olaraq Kəlbəcər istiqamətində döyüşlərdə iştirak etdiyi bildirilir.

Gizir İlqar İxtiyaroğlu 1994-cü ildə Goranboyun Goranlı kəndində anadan olub. Aprel döyüşlərinin də iştirakçısı olan hərbçimiz Vətən müharibəsi zamanı Tərtər Əlahiddə Kəşfiyyat Taborunun heyətində Suqovuşanın azadlığı uğrunda gedən döyüşlərdə savaşıb. Gizir sonuncu dəfə oktyabrın 6-da Ağdərə istiqamətində “951” zirvəsi uğrunda gedən döyüşlərdə iştirak edib. Həmin gündən sonra hərbçimizdən xəbər yoxdur.

MAXE-əsgər Mehdiyev Asim Yaqub oğlu 2001-ci il təvəllüddür. Sonuncu dəfə oktyabrın 7-si Xocavənd istiqamətində döyüşlərdə iştirak edəndən sonra ailəsi ilə əlaqəsi kəsilib. Həmin tarixdən bu yana hərbçimizdən xəbər yoxdur.

25 yaşlı əsgər Feyzullayev Aydın Zakir oğlu sentyabrda Suraxanı Səfərbərlik Xidməti tərəfindən təlimlərə çağırılıb. Döyüşlər başlayanda onları Horadizə aparıblar. Müharibənin ilk günləri ailəsiylə əlaqə saxlasa da, oktyabrın 1-dən ondan xəbər ala bilmirlər.

Əsgərin atası Zakir Feyzullayev bildirib ki, oktyabrın 14-ü oğlunun dalınca Füzuliyə gedib, xidmət etdiyi hərbi hissəni, döyüşçü yoldaşlarını tapıb: “Döyüşçü yoldaşları dedilər ki, ermənilərlə 30-40 metr məsafədə 500-600 əsgər üzbəüz vuruşub. Aydın da yanlarında olub, sonradan ətrafa baxıblar ki, Aydın yoxdur. Hara yox olub bilinmir. Deyilənə görə həmin gün, həmin yerdə şəhidimiz olub. Danışdığım uşaqlar qayıdıblar, oğlum isə itkin düşüb. Həmin ərazilər azad ediləndən sonra döyüşçü yoldaşları şəhidlərimizin nəşini ərazidən çıxarıblar. 3-4 nəfər dostu bütün ərazini axtarıb, qamışlığa qədər baxıblar, Aydının nə ölüsünü, nə də dirisini tapa bilməyiblər”.

Əsgər Qədirli Elnur Rəcəb oğlu 1997-ci ildə İsmayıllının Diyallı kəndində anadan olub. Sentyabrın 29-da Vətən müharibəsinə yollanıb. Ailəsi sonuncu dəfə Elnurla oktyabrın 7-də əlaqə saxlayıb. Həmin tarixdən sonra Elnurdan xəbər yoxdur.

Əsgər Salamov Qorxmaz Bayram oğlu 1996-cı ildə anadan olub. Şəkinin Baş Göynük kəndindəndir. Sonuncu dəfə ailəsi ilə oktyabrın 14-də əlaqə saxlayıb. Qorxmazın həmin vaxt Suqovuşan istiqamətində olduğu bildirilib. Sonrada əsgərdən xəbər alınmayıb.

Əsgər Səfərli Xəqani İlqar oğlu 1991-ci il təvəllüdlüdür.  Vətən müharibəsinə Bakının Xətai rayon Hərbi Komissarlığının çağırışı ilə gedib. Sonuncu dəfə ailə üzvləri ilə oktyabrın 4-də əlaqə saxlayıb. Həmin tarixdən sonra yaxınları Xəqanidən xəbər ala bilmir.