Radikal “Taliban” hərəkatı Əfqanıstanın bütün ərazisində vəziyyətə nəzarəti ələ aldığını bildirib.
Bəyanatda bildirilib ki, ölkənin paytaxtında hərbi əməliyyatlar aparılmır, hərəkat bütün Əfqanıstana nəzarət edir.
“Taliban” Əfqanıstanın Bəhram bazasını da nəzarət altına aldığını elan edib.
Əfqanıstan Prezidenti Əşrəf Qani vəzifəsindən istefa verməli olub.
Dövlət başçısının istefasından sonra müvəqqəti hökumət formalaşdırılıb. Əfqanıstanın keçmiş daxili işlər naziri Əhməd Cəlali ölkədə keçid hökumətinin başçısı vəzifəsini öz üzərinə götürüb.
Albaniya Əfqanıstanda amerikalı hərbçilərə və diplomatlarla köməklik göstərən qaçqınları ABŞ-ın xahişi ilə müvəqqəti olaraq öz ərazisində yerləşdirməyə hazır olduğunu bəyan edib. Bu barədə ölkənin Baş naziri Edi Rama tvitter səhifəsində bildirib. O, qeyd edib ki, ABŞ Prezidenti Co Bayden Administrasiyası NATO-nun üzvü olan Tiranadan Əfqanıstandan təxliyə olunan, ABŞ-a daxil olmağı gözləyən qaçqınlar üçün tranzit məntəqə rolunu oynamağı xahiş edib.
Qeyd edək ki, “Taliban” bundan öncə Xost əyalətinin paytaxtı Xost şəhərinin nəzarət altına keçdiyini, əyalətin qubernatoru, polis rəisi, kəşfiyyat xidməti və digər idarə orqanlarının tamamilə ələ keçirildiyini bildirmişdi. O da bildirilmişdi ki, hakimiyyət qüvvələri böyük itki verərək, öz mövqelərini tərk edib, silah-sursatı atıb qaçmalı olublar.
Müvəqqəti hökumətin başçısı Əhməd Cəlali
Əfqanıstanın keçmiş prezidenti Əşrəf Qəni
