Belarus idmançısı Kristina Timanovskaya Polşadan humanitar vizası alıb.
Bu haqda Polşa xarici işlər nazirinin müavini Marçin Pşidaç özünün Twitter hesabında yazıb.
“Belaruslu idmançı Kristina Timanovskaya artıq Tokiodakı Polşa diplomatları ilə birbaşa təmasdadır. Ona humanitar viza verilib”, deyə o, qeyd edib.
M.Pşidaçın sözlərinə görə, Polşa Timanovskayaya idman karyerasını davam etdirmək üçün əlindən gələni edəcək.
Qeyd edək ki, Tokio-2020 Yay Olimpiya Oyunlarında çıxış edən 24 yaşlı atlet Belarus hökumətinə qarşı işlətdiyi ifadələrə görə ölkəsinə qayıda bilməyib. O, Yaponiya paytaxtından Belarusa qayıtmalı olsa da, təyyarə sonda Tokionu onsuz tərk edib.
İdmançı gecəni hava limanındakı hoteldə keçirməli olub.
