İraqın paytaxtı Bağdadda koronavirus xəstələri üçün ayrılan xəstəxanada yanğın baş verib.
Bu barədə İraqın INA informasiya agentliyi ölkənin Daxili İşlər Nazirliyinə istinadən məlumat yayıb.
Bildirilib ki, yanğın nəticəsində 82 nəfər həlak olub, azı 110 nəfər xəsarət alıb. İlkin ehtimala əsasən, yanğına oksigen balonunun partlaması səbəb olub, ölüm hallarının çoxu dəm qazından zəhərlənmə nəticəsində baş verib.
İkimərtəbəli bina daxildən tamamilə yanıb. Alovun söndürülməsinə 30-a yaxın yanğınsöndürmə briqadası cəlb edilib.
Bəzi məlumatlara əsasən, hadisə anında xəstəxanada təxminən 200 nəfər olub. Faciə ilə əlaqədar bütün ölkə üzrə üç günlük matəm elan olunub.
Xəstəxananın baş həkimi, təhlükəsizlik xidmətinin rəisi və klinikanın texniki təhlükəsizliyinə məsul şəxslər saxlanılıb. Baş verənlərlə əlaqədar bazar ertəsi günü İraq parlamentinin təcili iclası gözlənilir.
İraqın Baş naziri Mustafa əl-Kazımi baş vermiş yanğın hadisəsinə görə ölkənin səhiyyə nazirini və Bağdadın qubernatorunu vəzifəsindən azad edib.
İstefaya göndərilən nazirlə qubernatora qarşı istintaq başladılıb.
82 nəfərin öldüyü yanğının baş verməsi səbəbi kimi səhlənkarlıq və yanlış idarəetmə göstərilir.