Siqaretlərin qiyməti qalxıb. Tütün məmulatları satıcılarının bidirdiyinə görə əməkdaşlıq etdikləri şirkətlərin təmsilçiləri səhər erkən gələrək bütün növ siqaretləri 20 qəpik baha satmağı tapşırıblar. Siqaretlər bu gündən bahalaşmış qiymətə satılır.
Nisbətən az imkanlı təbəqənin üz tutduğu “Oba”, “Al”market, “Araz” market və məhəlləiçi mağazaların satıcılarının dediyinə görə hələlik köhnə qiymətə alınan məhsullar satıldığından dəqiq qiymət artımı barədə məlumat yoxdur. Odur ki, məhsuların hamısını 20 qəpik baha satırlar. Onlara siqaretlərin qiymətinin 20-40 qəpik arası artacağı deyilib.
Siqaret satışında qiymət artımı ilə bağlı İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti ilə əlaqə saxlamaq mümkün olmayıb.
Qeyd edək ki, Martın 10-da Azərbaycanda tütün məmulatları və elektron siqaretlərin mayesi üçün yeni aksiz dərəcələri qüvvəyə minib.
1000 ədəd nazik siqaretin aksiz vergisi 31 manatdan 43 manata, 1000 ədəd siqaret üçün 31 manatdan 35 manata qaldırılıb. Elektron siqaretlərin mayesi üçün aksiz vergisi 5 dəfə artırılaraq 1 litri 100 manat təşkil edib.
1000 ədəd nazik siqaret idxalına aksiz dərəcəsi 29,5 manat, 1000 ədəd siqaretin – 37,5 manatdır.