Təhsil nazirliyi xaricdə təhsil almaq istəyənlər üçün müsabiqə elan edib. Qazaxıstan, Tayland krallığı və Rumıniyada təhsil imkanı yaranıb.
Bu barədə Təhsil nazirliyinin məlumatında bildirilir.
Azərbaycanın Təhsil nazirliyi ilə Qazaxıstan respublikası, Tayland Krallığı və Rumıniyanın təhsil qurumları arasında bağlanmış müqaviləyə əsasən bakalavr, magistratura və doktorantura səviyyəsində təhsil almaq mümkündür. Müsabiqənin şərtləri, tələbləri barədə məlumat nazirliyin saytında şeyləşdirilib.
Qazaxıstanda hərəsi 5 yer olmaqla təklif edilən bakalavr və magistr təhsili qazax, rus və ya ingilis dilindədir.
Tayland, magistratura təhsil səviyyəsi üzrə Azərbaycan tələbələrinə 5 yer ayırıb. Taylandda tədris ingilis dilində olacaq.
Rumıniya Təhsil və Tədqiqat Nazirliyinin Azərbaycan vətəndaşları üçün təqaüd proqramında bakalavr və magistratura üzrə 3 yer, doktoranturaya 2 yer ayrılıb. Bakalavr və magistrlar üçün yaş həddi 35, doktorantura üçün 45-dir. Rumıniyada tədris rumın dilindədir. Rumıniyada təhsil alanlara 65-85 avro dəyərində aylıq təqaüd veriləcək.
Qeyd edək ki, xaricdə təhsil alan Azərbaycan vətəndaşlarının ildə bir dəfə vətənə gediş-gəliş xərclərini Təhsil Nazirliyi ödəyir.
Xatırladaq ki, 2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı həyata keçirilib. Xaricdə təhsil alanların qarşısında təhsilini bitirəndən sonra Azərbaycana qayıtmaq, 5 il ölkədə işləmək öhdəliyi qoyulur.