“Azərbaycan yanvar ayının 18-dən peyvəndləmə prosesinə başlayıb. Biz regionda peyvəndləməyə start vermiş ilk ölkələrdən biriyik”.
Prezident İlham Əliyev bunu martın 4-də İqtisadi Əməkdaşlıq Təşkilatının XIV onlayn Zirvə toplantısında çıxışında deyib. Covid-19 vaksinlərinin inkişaf etmiş və inkişaf etməkdə olan ölkələr arasında ədalətiz şəkildə bölünməsini pisləyib.
Azərbaycanın COVAX platforması çərçivəsində “Pfizer-BioNTech” vaksinlərini əldə edəcək 18 ölkə siyahısına daxil edilməməsi narazılıq yaradıb.
İcbari Tibbi Sığorta üzrə Dövlət Agentliyi (Agentlik) də yaydığı məlumatda vaksinlərin ədalətsiz bölünməsini qeyd edir. Bununla bağlı ÜST-ə etirazını bildirib.
Agentliyin məlumatına görə Azərbaycan ÜST-ün tövsiyələrini nəzərə alaraq vaksinasiya strategiyasını təsdiqləyib və vaksinlərin qəbulu üçün bütün texniki tələbləri yerinə yetirib. COVAX platforması ilə əməkdaşlığa ilk qoşulan 50 ölkədən biridir.
Agentliyin məlumatında COVAX layihəsinin faktiki olaraq öz öhdəliklərini yerinə yetirə bilmədiyi deyilir. Qurum təşəbbüskar qurumları qərara yenidən baxmağa çağırıb.
Qeyd edək ki, Azərbaycanda vaksinasiya prosesi yanvarın 18-dən başlayıb. Azərbaycanın Çinin “Sinovac” şirkətinə 4 milyon doza vaksin sifariş edildiyi açıqlanıb.
Nazirlər Kabineti yanında Operativ qərargahın məlumatına görə martın 4-də yeni koronavirus (COVID-19) infeksiyasına qarşı 26,601 nəfər vaksinasiya olunub. 363,183 nəfər peyvəndlənmə prosesində iştirak edib. Vaksinasiya Respublikamızın bütün rayonlarında uğurla davam etdirilir.
Xatırlatma
2019-cu ilin sonlarında dünyada yeni koronavirus aşkar edilib. 2020-ci il martın 11-də Dünya Səhiyyə Təşkilatı koronavirusu pandemiya elan edib.