Türkiyə əsaslı şəkildə sübut edib ki, o, Cənubi Qafqazda sadəcə yeni və böyük oyunçu deyil, ən təsirli oyunçudur. Ankara bu roldan Rusiyadan daha yaxşı istifadə edir. Bu barədə Turan-a müsahibəsində Rusiyanın məşhur hərbi eksperti, “Ejednevnıy jurnal” (“Gündəlik jurnal”) onlayn-portalın baş redaktoru Aleksandr Qolts bildirib.
“Ankara birmənalı olaraq Azərbaycanın tərəfində çıxış edir, o, hər şeyi açıq edir, Rusiya isə “uşaqlar, gəlin, mehriban yaşayaq” kimi bəyanatlardan uzağa gedə bilmir”.
Rusiyanın strategiyası yoxdur, buna görə o, öz imici nöqteyi-nəzərdən çox ağır itkilər verir, deyə ekspert Türkiyənin regiondakı rolunu necə qiymətləndirməsi barədə suala cavabda bildirib.
Rusiya Ermənistana hərbi yardım göstərə bilər? Bu suala cavabda Qolts deyib ki, o, bunu edə bilməz, belə ki, müharibə Azərbaycan ərazisində gedir. “Heç bir ölkə Dağlıq Qarabağı tanımayıb və ermənilərə hərbi dəstək Azərbaycanla müharibəyə girmək demək olardı. Qarabağ de-yure Azərbaycandır”, deyə ekspert qeyd edib.
Eyni zamanda, o qeyd edib ki, Rusiyanın və Ermənistanın hərbi sahədə əməkdaşlıq haqqında kifayət qədər ciddi müqaviləsi var, Gümridə hərbi baza var, birləşmiş qoşun qruplaşmaları var, birgə RƏM sistemi və nəhayət, Türkiyə və İranla sərhədi mühafizə edən 4,5 min sərhədçi var.
“Amma bütün bunlar Qarabağın deyil, Ermənistanın mühafizəsi üçündür və döyüşlər Ermənistan ərazisinə keçərsə, onlardan istifadə oluna bilər”, deyə Qolts bildirib.
Eyni zamanda, o qeyd edib ki, müharibə daha bir neçə həftə uzanarsa, döyüş sursatlarının göndərilməsi və hər iki tərəfdə əsasən Rusiya istehsalı olan texnikanın təmiri məsələsi yaranacaq. “Bax, onda çox şey Rusiyanın tarazlığı qoruya bilib-bilməməsindən və kimə hərbi texnika göndərməsindən asılı olacaq. Amma Ermənistana göndərmək qərarına gəlsələr belə, bunu necə edəcəklər, çünki Gürcüstan hava məkanını bağlayıb. Yalnız İran üzərindən göndərmək qalır, bu isə çox baha və çətindir”, deyə ekspert bildirib.
Moskvanın Paşinyan rejiminin devrilməsində maraqlı olduğu üçün Ermənistana hərbi dəstək göstərməməsi haqqında fikir nə dərəcədə inandırıcıdır? Bu suala cavabda Qolts deyib ki, ola bilər, “amma bu, çox bəsirətsiz mövqedir”. Onun sözlərinə görə, “ermənilər bunu unutmazlar və bağışlamazlar”.
Hərbi qüvvələrin tarazlığına toxunan Qolts Azərbaycanın canlı qüvvə və texnika nöqteyi nəzərdən qəti və dəfələrlə üstün olduğunu qeyd edib. Military Balance nəşrində yer alan məlumatlar bunu aydın şəkildə göstərir. “Amma müharibələr tarixində hərbi texnika və say üstünlüyünün həlledici rol oynamadığını göstərən çox sayda nümunə var. Müharibənin ilk 10 günündəki nailiyyətləri qiymətləndirsək, bu nailiyyətlər çox azdır, çünki Azərbaycanın çox irəliləməyib. Dövlət başçısı Qarabağa tam nəzarət planlarından danışıb. Hədəf budursa, məsələ bir neçə gün ərzində həll edilməlidir. Hələlik isə nəticələr azdır”, deyə Qolts bildirib.
Tərəflərin itkiləri haqqında suala cavabda ekspert deyib ki, dəqiq məlumat yoxdur və çox vaxt hər bir tərəf arzusunu həqiqət kimi qələmə verir. Ermənilərin hər-hansı dəlil göstərmədən otuz Azərbaycan təyyarəsinin və helikopterinin məhv edilməsi haqqında iddialarını yada salmaq kifayətdir. (Contact.az)