Azərbaycanda həbsdə olan müxalif siyasətçi Tofiq Yaqublu artıq 20-gündən çoxdur ki, yeməkdən imtina edib və ailəsi deyir ki, 13 kiloqrama yaxın çəki itirib.
“Özü bildirib ki, artıq onun üçün geri sayım başlayıb. Ancaq, buna baxmayaraq, o, aclığı dayandırmaq niyyətində deyil, davam etdirəcək”, – qızı Nigar Həzi BBC-yə deyib.
Həkim Adil Qeybulla onu iki dəfə, aprelin 19-da və 22-də müayinə edib.
“Aclığa bağlı ümumi halsızlığı, zəifliyi qalır, yeriməkdə çətinlik çəkir. Aclığı dayandırmasını təklif etsək də, Tofiq Yaqublu aclığı davam etdirməkdə israrlıdır”, – Adil Qeybulla özünün sosial media hesabında yazıb.
BBC Azərbaycanca Penitensiar Xidmətdən Tofiq Yaqublunun vəziyyəti ilə bağlı cavab ala bilməyib.
Ombudsman Aparatı da Yaqublu ilə bağlı bu qurum və Tibb Baş İdarəsinə müvafiq sorğular ünvanladığını bildirib: “Müraciətin icrası – Yaqublunun öz seçdiyi həkim tərəfindən də müayinəsi təmin olunub”, – Ombudsman Aparatından BBC-yə deyiblər.
BBC-yə danışan Milli Məclisin insan hüquqları komitəsinin sədri Zahid Orucun fikrincə, Tofiq Yaqublunu ölüm aclığı məqamına gətirib çatdıran qüvvələr var.
O hesab edir ki, hakimiyyətə müraciət etmək və “yollar axtarmaq daha məqbuldur”.
Milli Şuranın və Müsavat Partiyasının üzvü Tofiq Yaqublu 2023-cü ilin dekabrında saxlanılıb.
O, “dələduzluq” və “saxta sənəd hazırlama və istifadə etmə”də günahlandırılıb.
İttihamları qəbul etməyən Tofiq Yaqublu 9 illik həbsini “siyasi sifariş” adlandırıb.
Azərbaycan hakimiyyəti ölkədə heç kəsin siyasi fəaliyyətinə görə təqib olunmadığını bəyan edir.(BBC.com)