Təhsil eksperti, keçmiş deputat Etibar Əliyev məktəb şagirdləri arasında baş verən kriminal hadisələrə Facebook səhifəsində münasibət bildirib. Ekspert yazır:
“Üç gün əvvəl Şəmkir və Xaçmaz rayonlarında 10-cu sinif şagirdlərinin arasında yaranan mübahisələr bıçaqlanma ilə nəticələnib. Bir nəfər ölüb. Dünən səhər saatlarında isə Bakının Ramana qəsəbəsində 2008-cü il təvəllüdlü yeniyetmə özündən 4 yaş böyük şəxsə bıçaqla xəsarət yetirib.
Bu gün yenə acı bir xəbərə rast gəldim. Bakının Sabunçu rayonunun 71 saylı Tam orta məktəbində bıçaqlanma olub və şagird ölüb.
Baxın, səriştsəsiz menecerlərin yaratdığı təhsil mühiti budur. Necə oldu xoş niyyətlə yaradılmış “Məktəblinin dostu” layihəsi? Necə oldu “Məktəb qrantı” layihəsi? Dövlət babamın milyonları hara sovruldu? Mən Azərbaycan məktəbinin belə rəzil duruma düşməsini istəmirəm.
Bu dəhşətli faktları əks edirən yazını çox paylaşın ki, Azərbaycan Respublikası Prezidentinin Administrasiyasının Humanitar siyasət, diaspora, multikulturalizm və dini məsələlər şöbəsinin müdiri Fərəh Şirməmməd qızı Əliyeva da xəbərdar olsun… Bu xanımın kuratoru olduğu təhsil sahəsi haqqında bir yazısını, yaxud bir çıxışını kimsə eşidibmi? Görəsən təhsilin acınacaqlı durumu bu şəxsi niyə maraqlandırmır?