Son dörd gündə Laçın sərhəd-buraxılış məntəqəsindən 300-dən çox şəxs Ermənistana keçib, Azərbaycanın yerli mediası yazıb.
Azərbaycanın İctimai Televiziyası xəbər verir ki, onlara “sabah 170 nəfərin sərhədi keçəcəyi ilə bağlı məlumat verilib”.
Cümə axşamı günü Azərbaycanın İctimai televiziyasının (İTV) canlı yayımladığı görüntülərdə sərhədi keçənlərin arasında əksəriyyətin gənclər və azyaşlılardan ibarət olduğu görünür.
“İndiyədək Ermənistana gedənlər arasında Ermənistan, eləcə də Rusiya vətəndaşları olub”, yerli mətbuat yazır.
“Sərhəddən özü keçənlərlə yanaşı “Beynəlxalq Qızıl Xaç Komitəsinin avtomobilləri ilə Qarabağdan aralarında xəstələrin olduğu şəxslər də Ermənistana aparılıb”, – çərşənbə axşamı günü İctimai TV bildirib.
İTV-nin məlumatına görə, sərhədi keçənlərin iki çantası müsadirə olunub.
“Çantalardan birinin üzərində tanınmamış Dağlıq Qarabağ Respublikasının xəritəsi olub. O biri çantada isə qızıl zinət əşyalarının miqdarı çox olub”, – İctimai TV-nın müxbiri çərşənbə axşamı günü bildirib.
Çərşənbə axşamı günü Qarabağdakı yerli hakimiyyətin nümayəndələri bildiriblər ki, Rusiya sülhməramlıları iyunun 14-dən bəri ilk dəfə olaraq 41 Rusiya vətəndaşının və Qarabağlı tələbələrin Laçın keçid məntəqəsindən Ermənistana daşınmasını təmin edib.
Bazar ertəsi günü daha bir qrup Qarabağdan Laçın sərhəd keçid məntəqəsi vasitəsiylə Ermənistana keçib.
Onların keçidini yerli media yaxından izləyib. Qarabağı tərk edənlərin bəzilərinin erməni əsilli Rusiya vətəndaşları olduğu bildirilir.
Sərhədi keçən şəxsləri Rusiya sülhməramlıları müşayiət edib. Laçın sərhəd-buraxılış məntəqəsini keçən sakinlərin sənədləri və yükləri yoxlanılıb.
Ermənistan Azərbaycanın Laçın yolunu bağlaması ucbatından Qarabağdakı ermənilərin aclıqla üzləşdiyini bildirir.
Azərbaycan bu iddiaları rədd edir.
Qarabağda daxili ixtilafa dair xəbərlər yayılır
Bəzi Ermənistan informasiya vasitələri Qarabağda “humanitar fəlakətlə yanaşı“ daxili siyasi vəziyyətin də gərginləşdiyini bildirirlər.
News.am saytının “keçmiş Qarabağ dövlət naziri Ruben Vardanyana” istinadən yazdığına görə, bunun səbəbi “Arayik Harutyunyanın prezident vəzifəsindən” istefa vermək niyyəti olub. Lakin sonradan Arayik Harutyunyanın istefa vermək fikrində olmadığı məlum olub.
“Artsaxda vəziyyət o qədər gərginləşib ki, bu yaxınlarda bir qrup hərbi geyimli şəxs Artsaxın parlament binasına soxulub”.
Bu məlumatı parlamentin “Ədalət” fraksiyasının deputatı Metakse Hakopyan da təsdiqləyib, agentlik bildirir.
Məlum olub ki, “Qarabağ yığma qoşununun” komandiri Karen Matevosyan bir dəstə silahdaşları ilə birlikdə binaya daxil olaraq “parlamentin yeni seçilmiş rəhbəri David İşxanyandan prezident Arayik Harutyunyanı” təhqir etdiyinə görə hesabat tələb ediblər.
Sosial platformalarda narahatlıqlarını ifadə edən “Artsaxın fəal vətəndaşları” onlara zəng vuraraq təhdid etməyə başlayıblar. Karen Matevosyan bazar ertəsi günü Facebook-da birbaşa ünsiyyət zamanı təhdidlərin bundan sonra da davam etdiriləcəyi haqqında xəbərdarlıq edib.
Qarabağda daxili siyasi vəziyyətlə bağlı məlumatında “Faktİnfo” nəşri isə öz mənbələrinə istinad edərək yazır ki, “onlar vəziyyətdən iki çıxış yolunu görürlər”: ya Arayik Harutyunyan təcili istefa verməlidir, ya da Ağdam vasitəsilə “Artsaxa ərzaq tədarükü” başlayacaq.
Anonim mənbə əlavə edib ki, Harutyunyanın istefa vermək fikri yoxdur, ona görə də indi Ağdam vasitəsilə Qarabağa ərzaq məhsullarının idxalı məsələsi hakimiyyətin gündəmindədir.
Faktinfo-nun məlumatına görə, Qarabağda hökumət komandası yaradılıb və o, yaxın günlərdə, sabah və ya o biri gün Azərbaycan tərəfi ilə görüşə getməyə hazırlaşır. Görüşün Azərbaycanın “Bərdə şəhərində baş verəcəyi” iddia olunur. (BBC.com)