Ötən gecə İranda hərbi infrastruktur obyektlərində güclü partlayışlar baş verib.
Şərqi Azərbaycan əyalətinin Şəhid-Səlimi şəhərində mühərrik yağı istehsal edilən zavodda yanğın baş verib, İRNA xəbər agentliyi bildirib.
Tasnim xəbər agentliyinə görə, mərkəzi İsfahan əyalətində hərbi sursat fabrikinin dron hücumuna məruz qalıb. Həmçinin İranın qərbindəki Dizful şəhərindəki aviabazada partlayış, Həmədan (ölkənin qərbində) və Rəşt (şimalda) şəhərlərində partlayış və yanğınların baş verdiyi barədə xəbərlər var.
Partlayış səsləri Tehranda da eşidilib. Yerli sakinlərin sözlərinə görə, hökumət binalarına hücum edilib. Şahidlərin bildirdiyinə görə, İran paytaxtı üzərində təyyarələr havaya qaldırılıb. Ölən və yaralananlar barədə məlumat yoxdur.
İran Müdafiə Nazirliyi İsfahandakı sursat fabrikinə dron hücumunu təsdiqləyib. Bldirilib ki, yanvarın 28-də saat 23:30 radələrində Müdafiə Nazirliyinin mərkəzlərindən birinə dronlardan istifadə etməklə “uğursuz hücum” həyata keçirilib. Nazirliyin məlumatına əsasən, dronlardan biri hüva hücumundan müdafiə sistemləriylə vurulub, digər ikisi isə partladılıb. İran hərbçilərinə görə, binanın damına “kiçik ziyan dəyib”.
İranın hərbi obyektinə hücum edən dronların hansı ölkəyə məxsus olması barədə məlumat verilməyib. İsfahan şəhəri Tehrandan təxminən 330 kilometr cənubda yerləşir.
Al Arabiya televiziya kanalının bildirdiyinə görə, İsrail İranın hərbi sənayesini məhv etmək məqsədiylə xüsusi hərbi əməliyyat keçirib. İsrail bu bəyanatı şərh etmir.(BBC.com)