Azərbaycanın Tehrandakı səfirliyinin qarşısındakı videomüşahidə kameraları silahlı terrorçunun səfirliyin binasına girməsini sakitcə izləyən iranlı polisin şokedici fəaliyyətsizliyini qeydə alıb.
Kadrlardan görünür ki, səfirliyin əməkdaşları maşından çıxaraq binaya daxil olur. Saniyələr sonra bir avtomobil yüksək sürətlə yaxınlaşır və səfirliyin avtomobilinə çırpılır. Terrorçu avtomobildən enir və polisə əl edir ki, o, öz köşkündən çıxmasın.
Terrorçu səfirliyə daxil olur, hətta bundan sonra da silahlı polis səfirliyin qapılarının qarşısındakı köşkdən çıxmır və atəşə baxmayaraq, müdaxilə etmir.
Tehranın polis rəisi general Hüseyn Rəhimi vəzifəsindən uzaqlaşdırılıb.
“Qafqazinfo” xəbər verir ki, bu barədə məlumatı “Azad İran” teleqram kanalı yayıb.
Məlumata görə, İranın Baş Polis Komandanlığının əmri ilə general Abbasəli Məhəmmədiyan Tehranın polis rəisi vəzifəsinə təyin edilib. O, Əlborz əyalətinin polis rəisi və Tehran Təhlükəsizlik Polisinin keçmiş rəhbəri olub.
General Rəhimi isə “Fəraca” İqtisadi Təhlükəsizlik Polisinin rəhbəri təyin edilib.
Qeyd edək ki, bu gün Azərbaycanın Tehrandakı səfirliyinə terror hücumundan sonra İran tərəfdən ilk rəsmi açıqlamanı Hüseyn Rəhimi vermişdi.