İyunun 4-də Kürdəmir rayonunda keçirilən toy mərasimində rayon məhkəməsinin katibi Yaşar Cəbiyevlə rayon polis şöbəsinin əməkdaşı, polis kapitanı Vüsal Kərimov arasında baş verən münaqişəyə görə polis işdən çıxarılıb.
Bu barədə DİN Mətbuat Xidmətinin KİV və ictimaiyyətlə əlaqələr şöbəsinin rəisi, polis mayoru Elşad Hacıyev məlumat verib.
O, bildirib ki, bu məsələ dərhal DİN tərəfindən nəzarətə götürülməklə xidməti yoxlamalara başlanılıb və polis kapitanı V.Kərimov tutduğu vəzifədən azad olunaraq sərəncama götürülüb.
Qeyd edək ki, hadisə “Nicat Plaza” şadlıq sarayında baş verib. Toy mərasimində iştirak edən Kürdəmir Rayon Məhkəməsinin katibi Y.Cəbiyevlə Kürdəmir Rayon Polis Şöbəsinin Cinayət Axtarış Bölməsinin baş əməliyyat müvəkkili, polis kapitanı V.Kərimov arasında mübahisə yaranıb. Mübahisə nəticəsində dava-dalaş düşüb və polis məhkəmə katibini döyüb.