“Azərbaycan siyasi məhbuslara azadlıq” İttifaqı yeni siyahı dərc edib. Siyasi məhbus siyahısına 100 nəfər daxil olub.
Siyahı Sülh və Demokratiya İnstitutunun direktoru Leyla Yunus və Siyasi Məhbusların Monitorinq Mərkəzinin rəhbəri Elşən Həsənov tərəfindən tərtib edilib.
Prezidentin 27 may tarixli əfv sərəncamından sonra 21 fevral tarixli əvvəlki siyahı ilə müqayisədə siyasi məhbusların sayı 26 nəfər azalıb.
Siyahıya yeni siyasi məhbusların – bloger Rəşad Ramazanov və “Müsəlman Birliyi” Hərəkatının üzvü Elşən Abbasovun adı daxil edilib.
Siyahıda 6 qrup təsnif edilib.
“Jurnalistlər və blogerlər” kateqoriyasında 4 nəfərin – xeberman.com saytının rəhbəri Polad Aslanov, yukselis.info saytının rəhbəri Elçin Məmməd, bloger Aslan Qurbanov və Rəşad Ramazanovun adları var.
“Müxalif partiya və hərəkatların üzvləri” qrupunda 9 nəfər var: Vətəndaş və İnkişaf Partiyasının lideri Əli Əliyev, Xalq Cəbhəsi Partiyasının üzvləri Niyaməddin, Əhmədov, Aqil Hümbətov, Pünhan Kərimli, Şahin Hacıyev, Mütəllim Orucov, Məlik Rzayev, Almaniyada fəaliyyət göstərən “Azad Azərbaycanı Seç” təşkilatının üzvü Cəfər Mirzəyev və Samir Aşurov.
Bu qrupdakı beş nəfər Almaniyadan deportasiya edildikdən sonra həbs edilmiş Pünhan Kərimli, Mütəllim Orucov, Məlik Rzayev, Cəfər Mirzəyev və Samir Aşurovdur.
“Dindarlar” qrupunda 19 nəfər var: İslam Partiyasının lideri Mövsüm Səmədov, onun varisi İlham Əliyev, ilahiyyatçılar Abgül Süleymanov və Ceyhun Mustafayev. “Nardaran işi” üzrə məhbuslar, o cümlədən “Müsəlman Birliyi” Hərəkatının lideri Taleh Bağırzadə və onun köməkçisi Abbas Hüseynov, ilahiyyatçı Sərdar Babayev bu qrupdadır.
“Tərtər işi” üzrə həbs edilənlər qrupunda 27, “Gəncə işi” üzrə həbs edilənlər qrupunda isə 27 nəfər var.
“Ömürlük məhbuslar” qrupunda 14 nəfər var. Onlardan 6 nəfər 1995-ci il qiyamı ilə bağlı həbs edilmiş xüsusi təyinatlı polis dəstəsinin keçmiş zabitləri, 3 nəfər 1992-1993-cü illərdə Qarabağda döyüşmüş “Qaranquş” dəstəsinin üzvləri, 5 nəfər isə keçmiş baş nazir Sürət Hüseynovun işi üzrə həbs edilənlərdir.