Bu barədə Nazirlər Kabineti yanında Operativ Qərargah məlumat yayıb. Məlumatda qeyd olunur ki, ölkədə epidemioloji vəziyyətin yaxşılaşması ilə əlaqədar xüsusi karantin rejimi çərçivəsində yumşalmalar edilib.
Qərara əsasən, martın 6-dan dövlət orqanlarında (qurumlarında) vətəndaşların yerində qrup və fərdi qaydada qəbuluna, yas mərasimlərinin keçirilməsinə, bütün kütləvi tədbirlərin, o cümlədən idman tədbirlərinin keçirilməsinə icazə verilib.
Həmçinin ictimai iaşə obyektlərində qəlyan avadanlıqlarından istifadəyə və masaj xidmətlərinin göstərilməsinə qoyulan qadağa da qaldırılıb.
Sərnişinləri qarşılayan və yola salan şəxslərin hava limanının terminalına girişi də artıq sərbəstdir.
Dini ibadət yerlərinə tətbiq edilən say və eyni vaxtda ibadət üçün nəzərdə tutulan yerlərlə bağlı faiz məhdudiyyəti də ləğv olunub.
İctimai iaşə obyektlərində, eləcə də restoran, kafe, çay evləri və bu kimi digər məkanların fəaliyyəti ilə bağlı vaxt məhdudiyyəti, həmçinin hər bir masa arxasında 6 nəfərdən artıq toplaşmaqla bağlı məhdudiyyət də artıq yoxdur.
Mədəniyyət obyektlərinin, eləcə də kinoteatrların, teatrlar və konfrans zallarının, istirahət və əyləncə məkanlarının, həmçinin uşaq əyləncə məkanlarının (bulvar və parkların ərazisində olanlar da daxil olmaqla), habelə ,iri ticarət mərkəzlərinin nəzdindəki uşaq və digər əyləncə mərkəzlərinin, kinoteatrların fəaliyyəti ilə bağlı vaxt və say məhdudiyyəti götürülür.
Şənlik mərasimlərinin – toy, nişan, ad günlərinin keçirilməsi ilə bağlı vaxt və say məhdudiyyəti, pandemiya dövründə ictimai iaşə müəssisələrinə müştəri qəbulu zamanı tətbiq edilən adambaşı sıxlıq normaları, 10 nəfərdən artıq şəxsin iştirakı ilə tədris və repetitor xidmətlərinin həyata keçirilməsi məhdudiyyəti də ləğv edilib.
Vətəndaşlardan yalnız təyinatına uyğun – COVID-19 əleyhinə peyvənd, immunitet sertifikatı və ya peyvəndə qarşı əks-göstərişi olan sənədlər tələb olunacaq. Bildirilir ki, tələb 18 yaşdan yuxarı şəxslərə şamil olunacaq.
Qapalı məkanlarda maskadan istifadə qüvvədə saxlanılır.
Tətbiq edilən tələblərə riayət olunmadığı təqdirdə fiziki və hüquqi şəxslər İnzibati Xətalar Məcəlləsinə uyğun olaraq məsuliyyətə cəlb ediləcək.
Azərbaycanda koronavirus pandemiyasi ilə bağlı 2020-ci il martın 24-dən karantindir.
Sonuncu dəfə xüsusi karantin rejiminin uzadılması haqqında qərar fevralın 24-də verilib.
Karantin 2022-ci il mayın 1-i saat 06:00-dək uzadılıb.