Dekabrın 23-də Bakı Dövlət Universitetinin (BDU) təsərrüfat şöbəsinin işçisi olmuş təqsirləndirilən İsmixan Mirzəyevin BDU-nun rektoru Elçin Babayevin maliyyə məsələləri üzrə müşaviri Mirzə Mirzəyevi bıçaqlayaraq ona xəsarət yetirməsi ilə bağlı başlanmış cinayət işi üzrə məhkəmə iclası keçirilib.
İ.Mirzəyev məhkəmədə çıxış edərək rektorun müşavirini niyə bıçaqladığını deyib. O, bildirib ki, maaşı azaldılıb 600 manatdan 400 manata endirildiyi üçün bir neçə dəfə rəhbərliklə görüşərək narazılığını bildirib, lakin nəticədə onu işdən çıxarıblar.
11 il BDU-da işlədiyini deyən İ.Mirzəyev əlavə edib ki, maddi durumu yaxşı deyildi, borcları, evdə xəstəsi vardı. Maaşı 400 manata salınanda bir neçə dəfə rektorla görüşmək istəsə də, cəhdləri nəticə verməyib:
“Mənə hər dəfə deyilirdi ki, bir müddət sonra universitetdə struktur dəyişikliyi olacaq, onda maaşım da artacaq. Amma struktur dəyişikliyi olsa da, maaşım dəyişmədi. Rektorun müşaviri Mirzə müəllimə yönəltdilər, onunla görüşdüm. Söz verdi ki, bir neçə günə mənə xəbər edəcəklər. Hadisə günü mənimlə işləyən Qaçay gəlib xəbər verdi ki, maaşın artması bir yana, səni işdən çıxarıblar. Dəliyə döndüm. Rektorun qəbuluna getsəm də, yenə qəbul etmədi.
Mən də rektorun müşaviri Mirzə Mirzəyevin qəbuluna gedib, ona ailədəki maddi durumun ağırlığını, ürək əməliyyatı keçirdiyimi dedim. Mirzə müəllim mənə söz verdi ki, məsələ araşdırılacaq. Sexə qayıdanda isə gördüm ki, artıq mənə aid əşyalar yığışdırılıb. Hətta özümə aid avadanlıqları da vermədilər. Bıçaq itiləyən yerdən bıçağımı və sənədlərimi götürüb evə gedirdim. Fikirləşdim ki, bir daha Mirzə müəllimlə görüşüm. Ona dedim ki, “iki ildir mənə maaşın qalxacağına söz verirsiz, nəticə də bu”. Bir anlıq həyəcanlandım, sənədlərin arasından bıçağı götürüb onu vurdum.
Bu vaxt otağa universitetin komendantı Şahlar Bəgalıyev gəlib. Müdaxilə etmək istəyəndə onu da vurdum və otaqdan çıxdım. Həmin gün universitetdə imtahan günü olub. İmtahan günlərində isə ali təhsil müəssisəsində Təcili Tibbi Yardım olur. Həkimlərə yuxarıda yaralılar olduğunu xəbər verib, çıxıb getdim.
Əməlimdən peşmanam. Amma mən maaşımın azaldılmasına iki il dözdüm. İmkanım yox idi, borclarım vardı”.
Daha sonra rektorun maliyyə məsələləri üzrə müşaviri, iş üzrə zərər çəkmiş Mirzə Mirzəyev və komendant, iş üzrə şahid Şahlar Bəgalıyev dindirilib. Onlar təqsirləndirilən şəxsdən şikayətçi olmadıqlarını deyiblər.
M.Mirzəyev təqsirləndirilən şəxsin verdiyi ifadəni təsdiqləyərək əlavə edib ki, İ.Mirzəyev bir neçə dəfə ona yaxınlaşaraq, problemi barədə məlumat verib:
“Hətta mənə BDU-nun keçmiş rektoru Abel Məhərrəmovla aralarındakı problemdən, onu məhkəməyə verəcəyindən də danışıb. Maaşın azaldılmasıyla bağlı məsələdən xəbərdar idim, ancaq əmək haqqının artırılması mənim səlahiyyətlərim çərçivəsində deyildi. Hadisə günü göz həkimindən gəlmişdim. O, otağa daxil olanda ayaq üstündəydim. Əlində sənədlər vardı. İşdən çıxarılması haqda dedi, bildirdim ki, xəbərim yoxdur. Yaxınlaşdı və gözləmədiyim halda məni vurdu. Bu zaman Şahlar otağa daxil oldu, onu da vurdu. Mənə indiyədək təəccüblüdür ki, məni niyə bıçaqladı”.
Qeyd edək ki, 2021-ci ilin iyulunda baş vermiş bu hadisə ərəfəsində İ.Mirzəyev BDU-nun keçmiş rektoru Abel Məhərrəmovla məhkəmə çəkişməsində idi. İ.Mirzəyev həmin məhkəməsində bildirmişdi ki, keçmiş rektorun Bakıda tikdirdiyi villada, Nabranda bağ evində, ona məxsus böyük obyektlərdə, o cümlədən “Mona Liza” şadlıq sarayında tikinti, mebellərin quraşdırılması kimi işləri görüblər. Ancaq Abel Məhərrəmov onun rəhbərlik etdiyi briqadanın nə zəhmət haqqını, nə də avadanlıqların pulunu ödəyib. O, A.Məhərrəmovun onlara 811 min manat ödəməli olduğunu deyib. O, briqadaya daxil olan ustaların və avadanlıqları satan adamların pullarını ondan tələb etdiklərini deyib.
Yasamal Rayon Məhkəməsi onun keçmiş rektor və keçmiş deputata qarşı iddiasını təmin etməyib. İ.Mirzəyev məhkəmə qərarının elan edildiyi gün hakim Vahid iddianı təmin etdiyini desə də, sonradan qərarın dəyişdirildiyini bildirmişdi.
Xatırladaq ki, BDU təsərrüfat şöbəsinin işçisi olmuş İsmixan Mirzəyev Cinayət Məcəlləsinin 126-ci (qəsdən sağlamlığa ağır zərər vurma) maddəsi ilə ittiham edilir.
BDU-nun rektoru Elçin Babayev və müşaviri Mirzə Mirzəyev