Cinayət Məcəlləsinin 311.3.2 (Rüşvət alma) maddəsi ilə mühakimə edilən “Yeni Klinika”nın keçmiş direktoru Pərviz Abbasovun və digərlərinin məhkəmə iclası başa çatıb.
Bakı Ağır Cinayətlər Məhkəməsində keçirilən sonuncu məhkəmə iclasında Pərviz Abbasov, “Buta” Klinikasının həkimi işləmiş Qalib Nəcəfov, Qida Təhlükəsizliyi İnstitutunun baytarı Əvəz Hüseynov, “Avrasiya” klinikasının keçmiş meneceri Vüsalə Əliyeva və Samir Mirzəyevə hökm oxunub.
Hökmə əsasən, keçmiş direktor Pərviz Abbasov 8 il 6 ay müddətinə azadlıqdan məhrum edilib.
Digər təqsirləndirilən şəxslər Qalib Nəcəfov, Əvəz Hüseynov və Samir Mirzəyevin hər biri isə 8 il müddətinə azadlıqdan məhrum etmə cəzası verilib.
Avrasiya klinikasının meneceri olmuş Vüsalə Əliyevaya isə himayəsində iki azyaşlı uşağı olduğuna görə və hazırda hamilə olduğu üçün iki il sınaq müddəti seçilməklə şərti cəza verilib.
Xatırladaq ki, həbs edilən şəxslər COVID-19 xəstəliyindən əziyyət çəkən şəxslərin “Yeni Klinika”ya yerləşdirilməsi müqabilində onların yaxınlarından pul almaqda ittiham olunurdular.
Onu da qeyd edək ki, 40 yaşlı Pərviz Abbasov ixtisasca cərrahdır. O, elmlər doktorudur, Avropa və ABŞ həkimlər konqresinin üzvüdür. P.Abbasov keçən ilin martında açılışı olan “Yeni Klinika”nın direktoru təyin edilmişdi.