Füzuli Rayon Mərkəzi Xəstəxanasının baş həkimi Natiq Şükürov və poliklinika şöbəsinin müdiri Şəfa Şükürovun qanunsuz əməlləri ilə əlaqədar başlanmış cinayət işinin istintaqı tamamlanıb.
Natiq Şükürov qeyd olunan vəzifədə işləməklə Həkim-Məsləhət Komissiyasının sədri səlahiyyətlərini həyata keçirərkən 2018-2019-cu illərdə əlillik dərəcəsinin təyin edilməsi üçün müraciət etmiş 15 şəxsi Komissiyada müayinədən keçirməyib. Amma onların təqaüd ala bilmələri üçün əsas olan xəstəlik barədə qəsdən təhrif edilmiş məlumatları özündə əks etdirən elektron göndərişləri qanunsuz olaraq özündə saxladığı elektron imzalar vasitəsilə təsdiq edib.
Göndərişləri aidiyyəti qurumlara göndərərək həmin şəxslərə əlillik dərəcələrinin təyin edilməsinə və bununla da cəmi 23 min 400 manat məbləğdə pul vəsaitinin həmin şəxslərin bank kartı hesablarına köçürülməsinə nail olub.
Bundan başqa, Natiq Şükürov törətdiyi cinayət əməllərinin ifşa olunmasından yayınmaq üçün rəhbərlik etdiyi xəstəxananın poliklinika şöbəsinin müdiri, eyni zamanda həkim-məsləhət komissiyasının üzvü olan qardaşı oğlu Şəfa Şükürov ilə birlikd göndərişlərlə bağlı aparılan sənədləşdirmənin guya qanuni olması görüntüsü yaratmaq məqsədilə bilə-bilə rəsmi sənədlərə yalan məlumatlar daxil etməklə qanunsuz olaraq həmin sənədləri xəstəxananın möhürü ilə təsdiq edib təkrarən vəzifə saxtakarlığı törədiblər
Natiq Şükürov barəsində Cinayət Məcəlləsinin 308.1 (vəzifə səlahiyyətlərindən sui-istifadə etmə) və 313 (vəzifə saxtakarlığı), Şəfa Şükürov barəsində isə Cinayət Məcəlləsinin 32.5, 313 (vəzifə saxtakarlığına köməklik etmə) maddələri ilə ittiham elan edilib.
İstintaq zamanı Natiq Şükürov vurduğu 23 min 400 manat ziyanı tam ödəyib.
Xatırladaq ki, Natiq Şükürov bu ilin mayında TƏBİB-in İdarə heyətinin keçmiş sədri Ramin Bayramlının əmri ilə vəzifəsindən azad olunub.
N.Şükürovdan sonra Füzuli Rayon Mərkəzi Xəstəxanasında baş həkimin vəzifələrini onun müavini Aygün Nağıyeva icra edib. Maraqlıdır ki, ötən günlərdə A.Nağıyeva da işdən azad edilib. Xəstəxanadan saytımıza bildirilib ki, 4 noyabr 2021-ci ildə A.Nağıyeva ilə bağlanmış müqavilənın vaxtı bitib, yenidən müqavilə imzalanmayıb.
Qeyd edək ki, Şükürovların Füzuli rayon səhiyəsindəki yeri bununla məhdudlaşmır. Füzuli Rayon Diaqnostika Mərkəzinin direktoru Şaiq Şükürov da Natiq Şükürovun qardaşı oğludur. Şaiq və Şəfa Şükürovlar əmioğludurlar. Ş.Şükürov daha əvvəl Horadiz Şəhər Xəstəxanasında baş həkim vəzifəsində işləyib.