Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) keçmiş icraçı direktoru Vüqar Səfərlinin cinayət işi üzrə məhkəmə araşdırması davam edir.
Proses Bakı Ağır Cinayətlər Məhkəməsində hakim Azər Paşayevin sədrliyi ilə keçirilir.
Vüqar Səfərli ilə birlikdə Bünyamin İsmayılov, Ədalət Vəliyev, Nadir Məmmədov, Bəxtiyar Fətullayev, Təmkin Xəlilov, Telman Tahirov, Valeh Orucov, Təhminə Yaqubova, Şahin İbrahimov və Namiq Hacıyev də hakim önünə çıxarılır.
Təqsirləndirilən şəxslərdən ancaq Nadir Məmmədov və Vüqar Səfərli barəsində həbs qətimkan tədbiri seçilib.
Bu güb baş tutan prosesdə təqsirləndirilən Ədalət Vəliyev ifadə verib.
“Protos” MMC-nin direktoru işləmiş Ə.Vəliyev heç nədən xəbəri olmadığını deyib və ayda 501 manat əmək haqqı aldığını söyləyib. Latın qrafikasında yaza və oxuya bilmədiyini deyən Ədalət Vəliyevə digər təqsirləndirilən Nadir Məmmədov hirslənərək cavab verib:
“Kişisən, düzünü danış. Niyə gizlədirsən? 501 manat maaş almısan, amma 32 milyon dəymiş ziyanı necə ödəmisən? 65 yaşım var və burada çürüyürəm. Əgər yazıb-oxuya bilmirsənsə, ASAN xidmətdə sənədləri necə imzalamısan?”.
Ə.Vəliyev cavab olaraq deyib ki, istintaqa 1 milyon manat və bir yaşayış binası verilib.
Təqsirləndirilən Namiq Hacıyev isə jurnalistlərin binasında parket əvəzinə laminat vurulmasını izah edib. O, deyib ki, binanın tikintisi üçün yalnız bir blok üçün armatur və beton veriblər. Onlar da bunu kompensasiya etmək üçün parketin laminatla əvəzləyiblər.
Qeyd edək ki, Vüqar Səfərli iş məhkəməyə göndərilənə qədər dəymiş zərərin cəmi 200 min manatını ödəyib. Digər təqsirləndirilən şəxslər də dəymiş zərərin müəyyən hissəsini ödəyiblər. Dəymiş zərərdən ən çox məbləğ ödəyən isə Ədalət Vəliyevdir. O, 1 milyon manat ödəyib.
Xatırladaq ki, bu iş üzrə V.Səfərlinin bir çox əmlaklarına həbs qoyulub. Vüqar Səfərlinin “Rabitəbank” ASC-də olan 300 min manat, eyni bankda oğluna məxsus 550 min manat əmanətin üzərinə məhkəmə qərarı ilə həbs qoyulub.
Bundan başqa Vüqar Səfərlinin ümumi dəyəri 637 min manat olan əmlaklarının da üzərinə həbs qoyulub. Həmçinin Vüqar Səfərlinin yoldaşının adına Binəqədidə olan torpaq sahəsi, oğlunun adına Novxanı kəndində olan torpaq sahəsi və yenə də oğlunun adına Xətai rayonunda olan obyektin üzərinə məhkəmə qərarı ilə həbs qoyulub.