Əfqanıstanda keçirilən toylarda bundan sonra canlı musiqi olmayacaq.
Bu qadağa “Taliban” hərəkatı tərəfindən qoyulub. Qadağa xüsusi iclasda qəbul edilib.
Afghanistan International telekanalının yaydığı məlumata görə, taliblər bayram yeməyindən əvvəl nikah mərasiminin keçirilməsini də qadağan ediblər və eyni zamanda qadın və kişilərin ayrı otaqlarda olmalarını əmr ediblər.
Əfqanıstanda toy mərasimi həyatın əsas hadisələrindən sayıldığı üçün bu şənlik burada, adətən, üç gün davam edir və mərasimdə bir neçə yüzə qədər qonaq iştirak edirdi, ənənəvi olaraq zəngin süfrələr açılır və bahalı hədiyyələr hazırlanır; varlı ailələrdə hədiyyələr hətta torpaq sahələri, avtomobillər və evlər ola bilər.
1996-2001-ci illərdə Əfqanıstanda hakimiyyətdə olarkən, “Taliban” əfqanların həyat tərzi və ailə həyatı ilə bağlı sərt qaydalar tətbiq etmişdi: televiziya ləğv edilmişdi, müasir musiqiyə, vizual sənətə, foto və video çəkilişlərə qadağa qoyulmuşdu, audio və video yazılar müsadirə edilib məhv edilmişdi, toy mərasimlərində mahnı oxumaq və rəqs etmək qadağan edilmişdi. Buna görə bir çox yerli musiqiçi və rəqqasə qonşu ölkələrə qaçmağa məcbur olmuşdu.