Rüşvət ittihamı ilə həbs edilən Fövqəladə Hallar Nazirliyinin Modul Tipli Hospitalının baş həkimi İmran Ağayevin cinayət işi üzrə bəzi məqamlar bəlli olub.
İttihama əsasən İ. Ağayev koronaviruslu xəstələrin Hospitalın “VİP korpusu”na yerləşdirilməsi müqabilində köməkçisi vasitəsilə pul yığıb. Baş həkimin köməkçisi ittiham üzrə özünü təqsirli bilərək törətdiyi əməlləri etiraf edib:
“Hospitalda qeydiyyatçı vəzifəsində işləyirdim. Eyni zamanda İmran həkimin qeyri-rəsmi köməkçisi idim. İmran Ağayev “Medi Style” klinikasının direktoru olduğundan həmin klinikada baş həkimin müavini vəzifəsində işləyən A. B ilə də qiyabi tanışlığım var idi. A. B bir neçə dəfə “Medi Style”a müraciət etmiş COVID-19 xəstələrinin bizim Hospitala yerləşdirilməsini xahiş edib. Aprelin 10-da o, ərinin qohumları olan iki nəfərin xəstəxanaya yerləşdirilməsini xahiş etdi. Buna görə 4 min manat verməsini dedim. Xəstələr hospitala yerləşdirildikdən sonra palatada onlardan pulu aldım. Daha sonra İmran həkimin otağında özünə verdim. Baş həkim bu işin qarşılığında mənə 200 manat “şirinlik” verdi.
2021-ci ilin martında hospitalda müalicə alan FHN-in əməkdaşını pul müqabilində 20-ci korpusdan “VİP korpus”a köçürmüşəm. Bu iş üçün aldığım 500 manatı baş həkimə vermişəm. İmran Ağayev həmin puldan mənə 100 manat qaytardı”.
İstintaq araşdırması zamanı məlum olub ki, A.B və baş həkimin köməkçisi xəstələrin klinikaya yerləşdirilməsi və ödənişlə bağlı məsələləri vatsapda yazışaraq həll ediblər. Həmin mesajları təqdim edirik:
A.B: Müəllim, VİP razılaşdı. Ambulansı göndərirəm, 4 min manat ödəniş edəcəklər. Ər-arvaddırlar, yoldaşımın qohumlarıdır. 30 dəqiqəyə orada olacaqlar. Analiz verməyiblər, artıq orada gotürərlər də.
Bundan sonra A.B xəstələrin şəxsiyyət vəsiqəsinin şəkillərini ona göndərib.
Baş həkimin köməkçisi: Mən indi bunları 14-ə keçirim, 14 verim bunlara, ya 18? 14 bildiyiniz məhşur 14-dür. 18 isə yeni açılan VİP-dir. Yaxşı rentgen elətdirərik.
A.B: Vallah bilmirəm ki, siz hansını məsləhət görürsüz. Ətrafları genişdir, gedib reklam edəcəklər. Yaxşı yer deyin.
İmran Ağayevin köməkçisi baş həkimin köməkçisi və Ə.B daha sonra ödənişin necə ediləcəyi ilə bağlı danışıblar. Baş həkimin köməkçisi ödənişi kimə edəcəklərini soruşub.
A.B: Sizə etsinlər də. Ambulansa 600 ödəyəcəklər, qalanını da ora ödəsinlər, ya ambulansa?
Baş həkimin köməkçisi: Yox, səhər özüm gedəcəyəm yanlarına, birinci 18-ə verirəm. Bəyənsələr qalarlar orada, bəyənməsələr 14-ə keçirərəm. Özüm götürərəm, 14-də indi boş palatam yoxdur.
A.B-nin “Onda mən heç nə deməyim özlərinə orada başa salarlar, qəbulda” mesajına cavab olaraq baş həkimin köməkçisi “Nə başa salsınlar? Heç kimə pul deməsinlər, səhər mən yaxınlaşacağam” yazıb.
Baş həkimin köməkçisi: İstəyirsizsə, Təcili Tibbi Yardıma ödəniş eliyəndə “summa”nı da ödəsinlər. Sizə necə uyğundursa, elə də edək. Mən indi gecə orada deyiləm, istəmirəm orada kiməsə versinlər, kimsənin məlumatı olsun bununla bağlı. İstəyirsizsə, təcili tibbi yardıma versinlər, onlar da sizə çatdırar, siz özünüz doktora verərsiniz. Necə istəyirsiz.
A.B: Yox, daha bir də desəm, özümə qarşı şübhə yaradacağam, dedim səhər sizə yaxınlaşacaqlar.
Baş həkimin köməkçisi: Yaxşı, nə vaxt gəlirlər? 15-ə verəcəm (VİP korpus)
Səhəri gün baş həkimin köməkçisi A.B-yə “Sabahınız xeyir, mən onlara dəydim, keflərini soruşdum, siz özünüz danışa bilərsiniz o məsələni? Üstlərindədirmi, gedim götürümmü mən onu?” mesajını yazıb.
A.B isə “Müəllim, mən onlara demişdim ki, səhər sizə yaxınlaşacaqlar, yəni deyəcəklər ki, ödənişi edin. Siz yaxınlaşıb deyə bilərsiniz, ödənişə görə yaxınlaşmısız. Bir də onlara deyin ki, ödənişi mənə edəcəksiniz, vəssalam, onlar biləcəklər”.
Baş həkim İmran Ağayev ittihamlar üzrə özünü təqsirli bilməyib. O, hospitalda müalicənin pulsuz olduğunu deyib:
“2020-ci ilin iyul ayından FHN-in Tibb Xidmətinin rəisi Kamran Əliyevlə “Medi Style” Hospital MMC-nin direktoru kimi müqavilə bağladıq. Əvvəllər həmin xəstəxanaya xəstələr Təcilli Tibbi yardım briqadaları, eləcə də müxtəlif özəl xəstəxanalardan gətirilirdi. 2021-ci ilin fevralından TƏBİB-in göstərişi əsasında xəstəxanaya yalnız Təcilli Tibbi yardım briqadaları tərəfindən gətirilən xəstələr yerləşdirildi. A.B məndən qohumları ilə bağlı məsələni xahiş edəndə bildirdim ki, kiminsə pul müqabilində xəstəxanaya yerləşdirilməsi mümkün deyil. Lakin vətəndaş Təcili Tibbi yardım maşını ilə deyil, hər hansı özəl klinikanın öz ambulans maşını ilə xəstəxanaya gətirəndə özəl klinikaya ödəniş edə bilər, bunun xəstəxanaya heç bir aidiyyəti yoxdur”.
Qeyd edək ki, İmran Ağayev Fövqəladə Hallar nazirinin müavini Faiq Tağızadənin bacısı oğludur.