Koronavirusa yoluxan Azərbaycan Cüdo Federasiyasının mətbuat xidmətinin rəhbəri, jurnalist Elnur Əşrəfoğlunun vəziyyəti ağırdır.
Jurnalistin müalicə aldığı “Yeni Klinika”dan bildirilib ki, onun ağciyərlərində 85 faiz buzlu şüşə aşkarlanıb.
“Onda kəskin tənəffüs və böyrək çatışmazlığı müşahidə edilir. Elnur Əşrəfoğlu 4 gün əvvəl klinikanın reanimasiya şöbəsinə köçürülüb. Xəstə hazırda süni tənəffüs aparatına qoşulu vəziyyətdədir. Saturasiyası 70 faizdir, ümumi vəziyyəti qənaətbəxş deyil”, – klinikadan bildirilib.
Azərbaycan Cüdo Federasiyasının baş katibi Elmar Babanlı isə açıqlamasında E.Əşrəfoğlunun müalicə aldığı klinika və ailə üzvləri ilə daim əlaqədə olduqlarını bildirib. O, iş yoldaşının müalicəsi üçün bütün lazımi tədbirlərin görüldüyünü deyib.
Qeyd edək ki, Elnur Əşrəfoğlu sentyabrın əvvəllərində koronavirusa yoluxub. Əvvəlcə ev şəraitində müalicə alan jurnalist daha sonra “Yeni Klinika”ya köçürülüb.