Bakı Ağır Cinayətlər Məhkəməsində külli miqdarda dələduzluqda təqsirləndirilən keçmiş hakim Lətif Nəbiyevin cinayət işi ilə bağlı istintaq yekunlaşıb.
Keçmiş hakim Cinayət Məcəlləsinin 178.3.2-ci (dələduzluq, külli miqdarda ziyan vurmaqda) 310-cu (Vəzifəli şəxsin səlahiyyətlərini mənimsəmə) maddələri ilə ittiham olunur. O, həm torpaq alqı-satqısı zamanı, həm də şərikli iş görmək adı ilə iki nəfərə qarşı 307 min dollardan çox dələduzluq edib.
Lətif Nəbiyev zərərçəkmiş Azad İbrahimovdan 247 400 dollar alıb. O, Türkiyədə yaşayan qohumu A.İbrahimovdan əvvəlcə 13 400 dollar alaraq ona sərfəli qiymətə torpaq sahəsi alacağı barədə vəd verib. Bir müddət sonra A.İbrahimovu Xətai rayonuna aparıb orada 7 sot boş ərazini göstərərək həmin torpaq sahəsini onun üçün aldığını bildirib. O, A.İbrahimovun etibarını qazanandan sonra Bakının sanatoriya yerlərindən birində, dəniz kənarında 120 sot torpaq sahəsi tapdığını, həmin torpağın dəyərinin əslində 500 min dollar olduğunu, ancaq hakimlik nüfuzundan istifadə edərək torpağı 240 min dollara ala biləcəyini deyib. A.İbrahimov isə onun dediklərinə inanaraq, ona 234 min dollar verib. L.Nəbiyev A.İbrahimovu dəniz kənarındakı həmin ərazidə istirahət mərkəzi tikərək böyük biznes qura biləcəyinə inandırıb. A.İbrahimov torpağın sənədini istəyəndə keçmiş hakim ona iki fərqli adamın adına ümumilikdə 100 sot olmaqla Pirşağı bələdiyyəsindən verilmiş 10 illik icarə müqaviləsi verib. O, bunu onunla izah edib ki, Azərbaycan qanunlarına əsasən, A.İbrahimov Türkiyədə yaşadığı üçün sənədləşmə birbaşa onun adına aparıla bilmir, ona görə də torpağı başqalarının adına alıb, sonra onun adına çıxarış alınacaq. Lakin A.İbrahimov məsələdən şübhələndiyi üçün Pirşağı bələdiyyəsinə gedərək əlindəki sənədləri göstərib. Orada məlum olub ki, həmin sənəd sadəcə 10 illik icarə müqaviləsidir və icarə müddəti bitəndən sonra ərazi dövlətin balansına keçəcək. Bundan sonra L.Nəbiyev zənglərə cavab verməyib, aldığı pulları da geri qaytarmayıb.
Digər zərərçəkmiş Rüstəm Abdullayev isə Lətif Nəbiyevə şərikli iş görmək adı ilə ona 59 700 dollar verib. L.Nəbiyev ona Ucar və Kürdəmirdə qaz, İsmayıllıda isə su və kanalizasiya xətlərinin çəkilişi ilə bağlı iş gördüyünü və yaxşı qazanc olduğunu bildirib. Sərmayə yatırdığı halda onun xeyir götürəcəyi vədini verib, lakin vəd olunan qazanc R.Abdullayevə ödənilməyib.
L.Nəbiyev ifadəsində A.İbrahimova heç bir borcu olmadığını, R.Abdullayevdən aldığı məbləğin isə bir hissəsini geri qaytardığını deyib. O, bildirib ki, A.İbrahimovdan aldığı 234 min dolları onun qardaşı Abbas İbrahimova verib. Abbas isə həmin pulu torpağı satan Pirşağı məscidinin axundu Əliyulla Məmmədova verib. Daha sonra Abbas vəfat edib.
İstintaq zamanı dindirilən axund Ə.Məmmədov bildirib ki, qeyd edilən ərazinin qonşuluğunda onun öz həyətyanı ərazisi var. Lətif Nəbiyevin dediyi 120 sotluq ərazi ona məxsus deyil, hətta dələduzluğu üzə çıxandan sonra L.Nəbiyev onun yanına gələrək “bu günlərdə səni “Bandotdel”ə ifadə vermək üçün dəvət edəcəklər, sən həmin idarədə olarkən ifadə verərsən ki, guya torpaq sahəsini mənə sən satmısan. Heç olmazsa ifadə ver ki, guya torpaq sahəsini Abbasa satmısan, onsuz da Abbas ölüb, heç kim bunu müəyyən edə bilməyəcək. Azad da heç nə edə bilməyəcək, məsələ də bağlanıb gedəcək” deyib. Lakin axund bunu qəbul etməyib.
Qeyd edək ki, Lətif Nəbiyev 2000-2007-ci illərdə Bakı Apellyasiya Məhkəməsinin, 2007-2008-ci illərdə isə Suraxanı Rayon Məhkəməsinin hakimi olub. 24 aprel 2008-ci ildə Məhkəmə-Hüquq Şurasının qərarı ilə statusundan və vəzifə səlahiyyətlərindən istifadə etməklə korrupsiya hüquqpozmasına yol verdiyinə görə səlahiyyətlərinə xitam verilib. Daha sonra Prezidentin sərəncamı ilə vaxtından əvvəl hakimlikdən azad olunub.