Dünyanı dəhşətə gətirmiş 11 sentyabr hadisəsindən 20 il keçdi
11 sentyabr 2001-ci il səhər saatlarında “American Airlines” və “United Airlines” aviakompaniyalarına məxsus olan, terrorçu-kamikadzelər tərəfindən qaçırılan “Boeing 767” tipli iki təyyarə Ümumdünya Ticarət Mərkəzinin 110 mərtəbəli “əkiz” binalarına, “Boeing 757” tipli üçüncü təyyarə isə Vaşinqtonda yerləşən ABŞ Müdafiə Nazirliyinin (Pentaqon) binasına çırpılıb.
Hadisə nəticəsində 3 minə yaxın insan həlak olub.
Nyu-York şəhərinə 36 milyard dollar həcmində zərər dəyib.
Qoşa binaların dağıntılarının təmizlənməsi 8 aydan çox vaxt aparıb, Pentaqonun binasının dağılmış qərb hissəsi isə 2002-ci ilin sentyabr ayında bərpa olunub.
Hadisənin təhqiqatı nəticələri barədə 2004-cü il tarixli məruzədə qeyd edilib ki, terror aktının qarşısının alınmasına Birləşmiş Ştatların kəşfiyyat xidmətlərinin fəaliyyətində koordinasiyanın olmaması əngəl törədib. Bundan bir müddət sonra ABŞ Prezidenti Corc Buş kəşfiyyat xidmətlərində islahatlar aparılması barədə sərəncam imzalayıb.
2001-ci ilin oktyabrında ABŞ və Böyük Britaniya Əfqanıstanda hərbi əməliyyatlara başlayıb. Əməliyyatlar terror aktında ittiham olunan “Əl-Qaidə” təşkilatına və onları dəstəkləyən “Taliban” hərəkatına qarşı yönəlib.
ABŞ-da hər il sentyabrın 11-i “Vətənpərvərlik günü”, “Dualar günü” kimi qeyd olunur. Bütün ölkə ərazisində matəm tədbirləri, memorial konsertlər təşkil edilir. Bütün federal binalarda dövlət bayraqları endirilir.
2002-ci il martın 11-də Ümumdünya ticarət mərkəzinin yerində həlak olanların xatirəsinə müvəqqəti abidə qoyulub. Bir ay ərzində Manhetten səmasına dağılan binaların simvolu olaraq iki paralel işıq sütunu ucalıb. Terror aktının onuncu ildönümündə isə “Əkiz” qüllələrin yerində hadisə qurbanlarının adlarının həkk edildiyi memorial kompleksin açılışı olub.
2014-cü ilin mayında ABŞ-da 11 sentyabr hadisələrinə həsr olunmuş muzey fəaliyyətə başlayıb. Muzeyin əsas hissəsi yer səthindən 20 metr dərinlikdə yerləşir. Ekspozisiyada, əsasən insanların qaçaraq xilas olmağa çalışdıqları beton pilləkən, dağılan binanın polad karkasının fraqmentləri, dağıntılar altında qalaraq əzilmiş yanğınsöndürən maşın və terror aktı qurbanlarının şəxsi əşyaları nümayiş olunur.
