Bakı Ağır Cinayətlər Məhkəməsində “Yeni Klinika” Publik Hüquqi Şəxsin direktoru Pərviz Abbasov və digərlərinin cinayət işi üzrə məhkəmə prosesi davam etdirilib.
Hakim Əfqan Hacıyevin sədrliyi ilə keçirilən prosesdə ifadə verən Samir Mirzəyev deyib ki, klinikanın direktoru Pərviz Abbasov onun qardaşının sinif yoldaşı olub:
“Özüm və atam koronavirusa yoluxanda həmin klinikaya yerləşdirilmişik, müalicə alıb sağalmışıq. Sağalıb klinikadan çıxandan sonra klinikaya xəstə yerləşdirmişəm. Əvəz mənə müraciət etdi. Mən də Pərviz həkimdən yaxın bir adamın vəziyyətinin ağır olduğunu deyərək ondan xahiş etdim. Pərviz həkim xəstənin klinikaya yerləşdirilməsinə icazə verdi. Mənim buna görə kimdənsə pul almağımdan həkimin xəbəri olmayıb. Sadəcə bu vəziyyətən istifadə etmişəm. Sonra da başqaları üçün həkimə müraciətim olub.
Hətta atam xəstəxanadan çıxandan sonra rayondan bir quzu kəsdirib gətirmişdim. Həkimə verdim, amma götürmədi”.
Prokurorun suallarını cavablandıran Samir Mirzəyev istintaqda təzyiqlə üzləşdiyi üçün Pəviz Abbasovun əleyhinə ifadə verdiyini vurğulayıb. O, Pərviz Ababsovdan xəstələrin klinikaya yerləşdirilməsi üçün heç bir göstəriş almadığını, ona pul vermədiyini söyləyib. O, özünü qismən təqsirli bilib.
Təqsirləndirlən Əvəz Hüseynov da özünü ittihamlarda qismən təqsirli bilərək deyib:
“Qida Təhlükəsizliyi İnstitutunun baytar həkimi vəzifəsində çalışmışam. Atam həmin klinikada koronavirus infeksiyasına görə müalicə alıb. Buna görə heç bir ödəniş etməmişəm. Bildilər ki, atamı həmin klinikada müalicə etdirmişəm, məlumat yayıldı ki, guya mən Pərviz həkimlə dostam. Hansı ki klinikaya xəstə yerləşdirmək üçün heç vaxt Pərviz həkimlə danışmamışam. Klinikaya xəstələri Samir Mirzəyev vasitəsilə yerləşdirmişəm.
Bir gün mənə Nailə adlı bir xanım zəng elədi dedi ki, bir xəstəni klinikaya yerləşdirmək lazımdır. Mən buna etiraz etdim. Hətta xanıma dedim ki, bir də mənə zəng etsəniz, sizə kobud cavab verəcəm. Bir müddət sonra adının Vüsalə olduğunu bildiyim bu xanım zəng elədi. Vüsalə xanım mənimlə mülayim danışdı, xəstənin təcili klinikaya yerləşdirilməli olduğunu dedi. Mən də insanlıq naminə razılaşdım”.
Ə.Hüseynov qeyd edib ki, Vüsalə Əliyeva xəstələrin şəxsiyyət vəsiqəsini ona göndərsə də, pul ödənilmədiyi halda xəstəni klinikaya yerləşdirməyiblər. O, xəstələrdən aldığı pulu geri qaytarmağa hazır olduğunu deyib:
“Xəstələrin yaxınlarından 2000-2500 manat tələb edirdim. Həmin pulun 1000 manatını özümə götürürdüm. Vüsalə Əliyevanın xəstələrdən konkret olaraq nə qədər almasından xəbərim yoxdu”.
Məhkəmənin növbəti iclası sentyabrın 7-də davam etdiriləcək.
Qeyd edək ki, təqsirləndirilən şəxslər COVİD-19 xəstəliyindən əziyyət çəkən şəxslərin stasionar qaydada müalicə olunmalarının təmin olunması məqsədilə tibb müəssisəsinə yerləşdirilməsi müqabilində onların yaxınlarından pul alıblar.
Həbs edilən şəxslərdən Qalib Nəcəfov “Buta” klinikasında həkim radioloq, Vüsalə Əliyeva “Avrasiya” klinikasında və “Viola” MMC-də menecer, Əvəz Hüseynov isə Qida Təhlükəsizliyi İnstitutunun baytar həkimi vəzifəsində işləyib.